Ukraina va Rossiya urushda halok bo‘lgan harbiy xizmatchilarning jasadlarini bir-biriga topshirdi. Bu haqda Ukrainaning okkupatsiya qilingan hududlar reintegratsiyasi vazirligi bayonotiga tayanib, “Gromadskye” xabar berdi.
“Alohida vaziyatlarda bedarak yo‘qolganlar ishlari bo‘yicha vakil ishtirokidagi muzokaralar natijasida 160 ga 160 formulasiga asosan jasadlarni almashish bo‘yicha kelishuvga erishildi”, — deyiladi Reintegratsiya vazirligi xabarida.
Ayirboshlash 2-iyun kuni Zaporojye viloyatidagi front chizig‘ida bo‘lib o‘tgan. Operatsiya Ukraina Mudofaa vazirligining Bosh razvedka boshqarmasi, Ukraina xavfsizlik xizmati, Ukraina Qurolli kuchlari Bosh shtabi va boshqa huquq-tartibot idoralari ishtirokida o‘tkazilgan.
Reintegratsiya vazirligining bayonoti qurbonlarning jasadini almashish to‘g‘risidagi ilk rasmiy xabardir. Avval Ukraina vakillari ham, Rossiya vakillari ham halok bo‘lgan harbiylarning jasadlarini topshirishga tayyor ekanini, biroq almashish bo‘yicha kelisha olmaganini aytgandi.
Rossiya tomoni jasadlarning almashinuvi borasida hozircha izoh bermagan.
Rossiya va Ukraina o‘z qurolli kuchlarining yo‘qotishlari haqida muntazam ravishda ma’lumot bermayapti. Ukraina prezidenti Vladimir Zelenskiy 1-iyun kuni Amerikaning Newsmax nashriga bergan intervyusida Ukraina sharqdagi janglarda har kuni 60—100 askarini yo‘qotayotgani va yana 500 nafari yarador bo‘layotganini aytgandi. BBC rus xizmatining 30-may kungi xabariga ko‘ra, ochiq manbalarda Ukrainada halok bo‘lgan kamida 3052 nafar rossiyalik askar va zobitlarning ismlari ma’lum qilingan.
Izoh (0)