Qozog‘istonda bugun, 5-iyun kuni mamlakat konstitutsiyasiga o‘zgartirishlar kiritish bo‘yicha referendum o‘tkazilmoqda.
Qozog‘iston Markaziy saylov komissiyasi xabariga ko‘ra, jami 10 mingdan ortiq saylov uchastkasi ochilgan. Ulardan 65 tasi 52 ta xorijiy davlatda tashkil etilgan. Referendumda 11,7 million kishi ovoz berishi mumkin.
Fuqarolardan “2022-yil 6-mayda ommaviy axborot vositalarida e’lon qilingan ‘Qozog‘iston Respublikasi konstitutsiyasiga o‘zgartish va qo‘shimchalar kiritish to‘g‘risida’gi qonun loyihasida nazarda tutilgan Qozog‘iston Respublikasi konstitutsiyasiga kiritilgan o‘zgartirish va qo‘shimchalarni qabul qilasizmi?” degan savolga javob berish so‘raladi.
Tuzatishlar davlat rahbarining vakolatlarini qisqartirishni taklif qiladi. Prezidentning yaqin qarindoshlariga davlat lavozimlarida ishlash taqiqlanadi. Mamlakatning birinchi prezidenti Nursulton Nazarboyevning alohida maqomiga oid barcha bandlar konstitutsiyadan olib tashlanadi.
Referendumda Qozog‘iston prezidenti Qosim-Jo‘mart To‘qayev ham konstitutsiyasiga o‘zgartirish va qo‘shimchalar kiritish uchun o‘z ovozini berdi.
“Davlat rahbari Qosim-Jo‘mart To‘qayev konstitutsiyaga o‘zgartirishlar kiritish bo‘yicha referendumda ovoz berdi. Davlat rahbari poytaxtdagi O‘quvchilar saroyida joylashgan 59-saylov uchastkasida ovoz berdi”, — deyiladi referendum haqida rasmiy ma’lumot beruvchi Telegram-kanalda e’lon qilingan xabarda.
Referendumni haqiqiy deb tan olish uchun unda saylovchilarning 50 foizdan ortig‘i ishtirok etishi kerak. Asosiy qonunga kiritilgan o‘zgartishlar viloyatlar, respublika ahamiyatiga molik shaharlar va poytaxtning kamida uchdan ikki qismida, ya’ni 17 ta viloyatdan 12 tasida fuqarolarning yarmidan ko‘pi ovoz bergan bo‘lsa, qabul qilingan hisoblanadi. Saylov uchastkalari 20:00 da (Toshkent vaqti bilan 19:00) yopiladi.
To‘qayev aprel oyida Qozog‘iston konstitutsiyasiga o‘zgartirishlar kiritish bo‘yicha referendum o‘tkazilishini e’lon qilgandi. O‘zgartirishlar mamlakat bosh qonunining 30 dan ortiq moddalariga taalluqli bo‘ladi.
Izoh (0)