Shimoliy Koreya Yapon dengiziga sakkizta qisqa masofali ballistik raketa uchirdi. Bu haqda Janubiy Koreya shtab boshliqlari birlashgan qo‘mitasiga tayanib Yonhap agentligi xabar berdi.
Janubiy Koreya harbiylariga ko‘ra, raketalar Pxenyandagi Sunan aeroporti atrofidagi tumanlardan mahalliy vaqt bilan 09:08 dan 09:43 gacha (Toshkent vaqti bilan 05:08 dan 05:48 gacha) uchirilgan. Shu bilan birga, agentlik manbasi KXDR raketalarni kamida ikki xil joydan uchirgani haqida xabar berdi.
Yaponiya mudofaa vaziri Nobuo Kisi Shimoliy Koreya kamida oltita ballistik raketa uchirganini aytdi. Yaponiya vazirligi birinchi raketani mahalliy vaqt bilan 9:14 da (Toshkent vaqti bilan 05:14) payqagan. Ulardan bir nechtasi Yaponiyaning eksklyuziv iqtisodiy zonasi tashqarisida dengizga qulagan.
Yaponiya hukumati hodisa munosabati bilan favqulodda vazirlik va xizmatlarning favqulodda yig‘ilishini chaqirdi.
AQSHning Hind-Tinch okeani qo‘mondonligi Shimoliy Koreyadan bir nechta ballistik raketa uchirilganidan xabardor ekanini, ittifoqchilar bilan maslahatlashayotganini hamda Janubiy Koreya va Yaponiyani himoya qilishga sodiqligini bildirdi.
Janubiy Koreya harbiylarining hisob-kitoblariga ko‘ra, bu KXDRning yil boshidan beri 18-marta raketa uchirshi. Oxirgi marta AQSH prezidenti Jo Baydenning Seul va Tokioga tashrifi hamda Quad sammitidan (22-mayda o‘tkazilgan) keyin KXDR Yapon dengiziga qarata uchta raketa uchirgan edi. Yaponiya buni Shimoliy Koreya tomonidan ochiq-oydin provokatsiya deb atadi.
23-may kuni Janubiy Koreya va AQSH javob raketalarini uchirdi. Seul “Xenmu-2” ballistik raketalarini, Qo‘shma Shtatlar esa bitta ATACMS raketasini Yapon dengizi tomon uchirdi. Shunday qilib, ittifoqchilar “zudlik bilan zarba berish” imkoniyatini namoyon qildi.
May oyi oxirida AQSH, Janubiy Koreya va Yaponiya Shimoliy Koreyaning raketa uchirishini qoraladi. Mamlakatlar vakillari Koreya yarim orolini to‘liq yadrosizlantirish maqsadida uch tomonlama hamkorlikni kuchaytirishga kelishib, Shimoliy Koreya vakillari bilan uchrashishga tayyor ekanini ta’kidladi.
Izoh (0)