AQSHning Oklaxoma shtati Talsa shahrida Maykl Lyuis ismli erkak shahar tibbiy markazi binosiga bostirib kirib, avvalroq o‘zini operatsiya qilgan jarrohni otib tashladi, deb xabar beradi “Kommersant”. O‘limidan oldin yozib qoldirgan xatida Maykl Lyuis shifokorni o‘zidagi og‘riqlar tufayli o‘ldirganini ma’lum qilgan.
Bemor AR-15 yarim avtomatik vintovka (soyli miltiq) va to‘pponchadan foydalangan. O‘zini davolagan shifokordan tashqari, u yana bir tibbiyot xodimini va ikki bemorni ham o‘ldirgan, deb xabar qiladi Reuters.
CNN telekanali ma’lumotlariga ko‘ra, yana taxminan o‘n kishi yaralangan. Politsiya hujum qilgan shaxs o‘zini otib tashlaganini taxmin qilmoqda.
Ta’kidlanishicha, bu AQSHda so‘nggi bir hafta ichida yuz bergan to‘rtinchi otishmadir. Ulardan biri 1-iyun kuni Oklaxomaning Talsa shahridagi boshqa bir kasalxonada sodir etilgandi. Oqibatda to‘rt kishi, shu jumladan o‘qotarning o‘zi ham halok bo‘lgan.
30-may kungi otishma ham shu shtatda, Taft shahridagi festivalda yuz berib, bir kishining o‘limi, yetti kishining yaralanishi bilan tugagan. 24-may kuni otishma bilan bog‘liq voqea Texasning Yuvald shahrida bo‘lib o‘tdi: 19 nafar o‘quvchi va 3 nafar katta yoshlilar halok bo‘ldi. Shundan keyin AQSH prezidenti Jo Bayden qurol lobbisiga qarshi kurashishga chaqirdi.
3-iyun kuni prezident amerikaliklarga murojaatida kongressni mamlakatda o‘qotar qurollar aylanmasi ustidan nazoratni kuchaytirishga chaqirdi. Xususan, u oddiy fuqarolarga hujum qurollarini va ko‘p sonli patronlar uchun o‘qdonlarni sotishni taqiqlashni taklif qildi. Agar bu taqiqning iloji bo‘lmasa, qurol sotib olish mumkin bo‘lgan yoshni 18 dan 21 gacha oshirish kerak, dedi AQSH rahbari.
Izoh (0)