Австрияда 2021 йилда ирқчилик ва исломофобия асосида мусулмонларга қарши 1061 та ҳужум қайд этилган. Бу ҳақда Австриянинг Мусулмонлар учун ҳужжатлар ва маслаҳат маркази (Dokustelle Osterreich) томонидан чоп этилган «Антимусулмон ирқчилик бўйича 2021 йилги ҳисобот»ига таяниб, Anadolu хабар берди.
Ҳужжатга кўра, ҳужумларнинг аксарияти рақамли платформаларда содир бўлган, чунки COVID-19 пандемияси туфайли онлайн ижтимоий мулоқот кўпроқ бўлган.
Ҳисоботда мусулмонларга қарши оғзаки ва жисмоний ҳужумларга дучор бўлганларнинг 69 фоизини аёллар, 26 фоизини эса эркаклар ташкил этгани қайд этилган. Кўп ҳолларда ҳижобли аёллар оғзаки ҳақоратларга, айрим ҳолларда эса жисмоний зўравонликка учраган.
Мусулмонларга қарши ҳужумларнинг 65,4 фоизи онлайн платформаларда содир этилган бўлса, уларнинг 34,6 фоизи ижтимоий ҳаётнинг турли соҳаларида содир бўлган.
Ҳисоботда, шунингдек, антимусулмон ирқчилик ҳаракатларининг 77 фоизи эркаклар, 22 фоизи аёллар томонидан содир этилгани айтилади.
Нафрат сўзлари ва мусулмонларга қарши тажовузга даъват қилиш умумий ҳодисаларнинг 78,5 фоизини ташкил қилган. Ҳақоратлар антимусулмон ирқчилик ҳолатларининг 9,1 фоизини ташкил қилган бўлса, мусулмонларга тегишли мулкка етказилган жисмоний зарар 2,4 фоизни ташкил этган.
Воқеаларнинг 4 фоизга яқинини ижтимоий ҳаётнинг турли соҳаларида мусулмонларга нисбатан камситиш ва ирқчилик хатти-ҳаракатлари ташкил этади.
Ирқчиликнинг бошқа кўринишлари, жумладан полиция зўравонлиги, таҳдидлар, психологик зўравонлик ва жисмоний таъқиблар ҳам умумий ҳолатларнинг 6,2 фоизини ташкил қилади.
Изоҳ (0)