Xorazm viloyati Urganch shahrida “Jaloliddin Manguberdi maktabi” qurilishiga ramziy tamal toshi qo‘yildi, deb xabar bermoqda Mudofaa vazirligi.
Qayd etilishicha, tadbirda Xorazm viloyati hokimi Farhod Ermanov, tuman hokimligi, mudofaa ishlari boshqarmasi hamda boshqa mutasaddilar ishtirok etgan.
2023—2024-o‘quv yilidan o‘z faoliyatini boshlaydigan ushbu ta’lim muassasasi 300 o‘ringa mo‘ljallangan. Unda birinchi yili 150 nafar hamda keyingi yil yana 150 nafar o‘quvchi qabul qilinadi.
Muassasa qurilishi uchun mahalliy budjet mablag‘laridan deyarli 30 milliard so‘mga yaqin pul mablag‘lari ajratilgan. Maktabda 4 qavatli o‘quv binosi, 300 o‘rinli yotoqxona, oshxona, madaniyat saroyi, harbiy tayyorgarlik mashg‘ulotlari uchun jangovar tayyorgarlik maydonchalari, sport majmuasi hamda zarur bo‘lgan boshqa ijtimoiy va o‘quv obyektlar qurilishi rejalashtirilgan. Tasdiqlangan loyiha-smeta hujjatlariga asosan “Chinobod qurilish” xususiy korxonasi tomonidan boshlangan qurilish jarayonlari jahon standartlari asosida, qat’iy me’yor talablarini bajargan holda amalga oshirilishi belgilangan.
Avvalroq Shavkat Mirziyoyev Farg‘onadagi “Yangi O‘zbekiston” mavzesining qurilishi bilan tanishgani, Navoiyda 75 milliard so‘mga prezident maktabi qurilgani haqida xabar berilgan.
Izoh (0)