Хоразм вилояти Урганч шаҳрида «Жалолиддин Мангуберди мактаби» қурилишига рамзий тамал тоши қўйилди, деб хабар бермоқда Мудофаа вазирлиги.
Қайд этилишича, тадбирда Хоразм вилояти ҳокими Фарҳод Эрманов, туман ҳокимлиги, мудофаа ишлари бошқармаси ҳамда бошқа мутасаддилар иштирок этган.
2023—2024-ўқув йилидан ўз фаолиятини бошлайдиган ушбу таълим муассасаси 300 ўринга мўлжалланган. Унда биринчи йили 150 нафар ҳамда кейинги йил яна 150 нафар ўқувчи қабул қилинади.
Муассаса қурилиши учун маҳаллий бюджет маблағларидан деярли 30 миллиард сўмга яқин пул маблағлари ажратилган. Мактабда 4 қаватли ўқув биноси, 300 ўринли ётоқхона, ошхона, маданият саройи, ҳарбий тайёргарлик машғулотлари учун жанговар тайёргарлик майдончалари, спорт мажмуаси ҳамда зарур бўлган бошқа ижтимоий ва ўқув объектлар қурилиши режалаштирилган. Тасдиқланган лойиҳа-смета ҳужжатларига асосан «Чинобод қурилиш» хусусий корхонаси томонидан бошланган қурилиш жараёнлари жаҳон стандартлари асосида, қатъий меъёр талабларини бажарган ҳолда амалга оширилиши белгиланган.
Аввалроқ Шавкат Мирзиёев Фарғонадаги «Янги Ўзбекистон» мавзесининг қурилиши билан танишгани, Навоийда 75 миллиард сўмга президент мактаби қурилгани ҳақида хабар берилган.
Изоҳ (0)