Namangan shahrining Davlatobod tumanidagi 52- umumta’lim maktabida zamonaviy dzyudo majmuasi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Ushbu majmua Xalq ta’limi vazirligi va O‘zbekiston dzyudo federatsiyasi o‘rtasida tuzilgan memorandumga asosan qurib bitkazildi.
Dzyudo majmuasi maktabning bo‘sh turgan maydonida barpo etildi. 144 ta tatami bilan jihozlangan ushbu inshoot yuvinish, kiyim almashtirish, trenajyor xonalarini ham o‘z ichiga olgan va to‘liq isitish tizimiga ulangan. Unda bir paytning o‘zida 200 nafar bola dzyudo bilan shug‘ullanish imkoniyatiga ega.
Ushbu majmua va uning yonida barpo etilgan sun’iy qoplamali futbol maydonchasini qurish uchun qariyb 3 milliard so‘m sarflandi.
Majmuaning ochilish marosimida Xalq ta’limi vaziri Baxtiyor Saidov, O‘zbekiston dzyudo federatsiyasi prezidenti Aziz Komilov, O‘zbekiston Milliy olimpiya qo‘mitasi raisi o‘rinbosari Sherzod Toshmatov, Namangan viloyati hokimining o‘rinbosari G‘ulomjon Murodxo‘jayev va jamoatchilik vakillari ishtirok etdi.
Ma’lumot uchun, bugungi kunda Namangan viloyatida 1,5 mingdan ortiq bola dzyudo bilan muntazam shug‘ullanib kelmoqda.
Izoh (0)