Shavkat Mirziyoyev Urganch shahrida Jaloliddin Manguberdi majmuasining qurilish jarayonini ko‘zdan kechirdi, deb xabar bermoqda Prezident matbuot xizmati.

Foto: Prezident matbuot xizmati

Davlat rahbari Xorazm viloyatiga 2018-yilda amalga oshirgan tashrifi chog‘ida Urganch shahrida Jaloliddin Manguberdi memorial bog‘i tashkil etish bo‘yicha ko‘rsatma bergan edi. Shunga muvofiq loyiha taklifi tayyorlanib, Prezidentning viloyatga 2020-yil mart oyida tashrif chog‘ida namoyish qilingandi.

Foto: Prezident matbuot xizmati

Xabarda aytilishicha, bu boradagi loyiha Prezidentning viloyatga ushbu tashrifi chog‘ida ko‘rib chiqilgan, mutaxassislar fikrlari asosida takomillashtirilgan. Majmua shaharning Al-Xorazmiy va Islom Karimov ko‘chalari kesishmasidagi qariyb 8 gektar maydonda bo‘ladi. Bugungi kunda haykalning asosi qurilmoqda. Bronzadan Jaloliddin Manguberdining ot ustida qilich tutib turgan haykali yasalgan. Uning asosi bilan birga jami balandligi qariyb 25 metr bo‘lib, uzoqdan ham ko‘rinib turadi.

Foto: Prezident matbuot xizmati

Shavkat Mirziyoyev majmua mazmunini boyitish, sharoitlarini yaxshilash bo‘yicha ko‘rsatmalar berdi.

“Bu yer bilim, ma’naviyat, g‘urur maskani bo‘lishi kerak. Kelganlar aylanib, hordiq chiqarishi bilan birga Manguberdi bobomiz hayotini yaqqol tasavvur qilishi, bundan ruh olishi kerak. Xiyobon bo‘ylab uning janglari, qahramonliklari haqida lavhlar yozib qo‘yish mumkin. Bu tarixni va chet tillarini yaxshi bilgan gidlar tayyorlash ham zarur”, — degan Prezident.

Qayd etilishicha, davlat rahbari Al-Xorazmiy ko‘chasi bo‘ylab qurilgan yerosti yo‘lini ham ko‘zdan kechirdi. Qurilish ishlari bitgach, hudud obodonlashtirilib, manzarali daraxtlar ekiladi, favvoralar barpo etiladi. Piyodalar va velosiped yo‘laklari, turizm xizmatlari tashkil etiladi.

Majmuani ekspluatatsiya qilishni to‘g‘ri yo‘lga qo‘yish, bu yerda bayram tadbirlari,  festivallar o‘tkazish uchun ham sharoit yaratish bo‘yicha ko‘rsatmalar berildi.