Rossiyada og‘ir jarohatlari sabab qiyin ahvolda qolgan O‘zbekiston fuqarolari vatanga qaytarildi

Kaliningrad viloyatida og‘ir ahvolda qolgan O‘zbekiston fuqarosi vatanga qaytarildi, deb xabar beradi Tashqi mehnat migratsiya agentligi.

13-may kuni Tashqi mehnat migratsiyasi agentligining Sankt-Peterburg shahridagi vakolatxonasiga Kaliningrad viloyatida vaqtinchalik mehnat faoliyatini olib borayotgan O‘zbekiston fuqarosi B.I. og‘ir tan jarohati olib, qiyin ahvolga tushib qolgani sababli vatanga qaytishda yordam so‘rab, murojaat qilgan.

Ma’lum bo‘lishicha, fuqaro B.I. 2021-yilning may oyidan buyon Kaliningrad viloyatida qonuniy mehnat faoliyatini olib borgan. 2022-yilning 30-aprel kuni ish joyida balandlikdan qulab tushish oqibatida oyog‘i singan va uzoq muddatga mehnat faoliyatiga yaroqsiz bo‘lib qolgan.

“Hamyurtimizning murojaati zudlik bilan o‘rganib chiqildi va 29-may kuni Fuqarolarning huquq va manfaatlarini qo‘llab-quvvatlash va himoya qilish jamg‘armasi mablag‘lari hisobidan vatanga qaytarildi”, — deyiladi xabarda.

Shuningdek, Leningrad viloyatida vaqtincha yashab, qonuniy tarzda mehnat faoliyatini olib borayotgan O‘zbekiston fuqarosi Sh.X. ham og‘ir ahvolga tushib qolgani sababli vatanga qaytarilgan.

Aniqlanishicha, fuqaro Rossiyaga 2019-yilning yanvar oyida qonuniy yo‘llar bilan kelgan, barcha kerakli hujjatlar asosida qurilish kompaniyasida mehnat faoliyatini olib borgan. 2022-yilning 8-aprel kuni ish joyida baxtsiz hodisa tufayli og‘ir tan jarohati olgan va uzoq muddatga mehnatga yaroqsiz bo‘lib qolgan.

Vakolatxona xodimlarining amaliy yordami bilan Sh.X. 30-may kuni O‘zbekistonga qaytarilgan.

Avvalroq Krasnodarda ish beruvchi tomonidan hujjatlari olib qo‘yilib, maoshlari to‘lanmay kelgan o‘zbekistonliklarga yordam berilgandi.