Tojikiston prezidenti Emomali Rahmon O‘zbekiston prezidenti Shavkat Mirziyoyevning taklifiga binoan Toshkentga keldi. Tojikiston rahbari Toshkentga Somon Air aviakompaniyasining yo‘lovchi reyslarini bajaruvchi samolyotida uchib keldi.
Somon Air aviakompaniyasining samolyotlari tojik davlatchiligi asoschisi Ismoil Somoniy va Tojikiston qahramonlari — Nusratullo Mahsum, Mirzo Tursunzoda, Bobojon G‘ofurov, Sadriddin Ayniy va Shirinsho Shotemur nomlari bilan ataladi.
Emomali Rahmon uchib kelgan, bort raqami EY777 bo‘lgan Boeing-737-800 samolyotiga yozuvchi, shoir, davlat va jamoat arbobi Sadriddin Ayniy nomi berilgan. Davlat rahbari 2018 va 2019-yillarda ham O‘zbekistonga aynan shu samolyotda uchib kelgandi. Emomali Rahmonning o‘g‘li, Dushanbe hokimi Rustam Emomali ham O‘zbekistonga ushbu samolyotda kelgan.
Tojikiston rahbarlarining xorijga tashriflaridan tashqari ushbu samolyot Somon Air aviakompaniyasining muntazam reyslarida foydalaniladi. O‘tgan hafta (23—29-may) davomida Sadriddin Ayniy nomidagi samolyot 10 marta Moskvaga, 1 martadan Toshkent va Olmaotaga reyslarni amalga oshirgan.
“Sputnik Tojikiston”ning qayd etishicha, Emomali Rahmon budjet pullarini iqtisod qilish uchun shaxsiy samolyot sotib olishni istamagan.
Izoh (0)