Ijtimoiy tarmoqlarda Farg‘ona shahridagi Markaziy dehqon bozori oldida joylashgan “Saxovat issiq non” MCHJ savdo do‘konida navbatlar yuzaga kelgani ko‘ringan video tarqalgandi. Mazkur holat Farg‘ona shahar hokimi Vosiljon Nazarov, sektor rahbarlari hamda masalaga dahldor boshqarma va bo‘lim mutaxassislari ishtirokida o‘rganildi. Bu haqda “Daryo”ga shahar hokimligi axborot xizmati xabar berdi.
O‘rganish jarayonida kecha (1-iyun) kun davomida avvalroq olingan un hisobiga non narxi 1500 so‘m bo‘lgani, shu bois non mahsulotlari ehtiyojdan ko‘p olingani uchun navbat yuzaga kelgani ma’lum bo‘ldi.
“Aholiga qulaylik yaratish, tirbandlikning oldini olish maqsadida bugundan boshlab issiq non korxonasi faoliyatini soat 08:00 dan emas, 07:00 dan boshladi. Shuningdek, non ishlab chiqarish hajmi ham ortdi. Aholi talabi to‘liq qondirilmoqda”, — deyiladi Farg‘ona shahar hokimligining “Daryo”ga bergan ma’lumotida.
Qolipli non kecha, 1-iyundan boshlab Toshkentda 2800 so‘mdan sotila boshladi. G‘alla bozori erkinlashtirilishini tahlil qilgan Iqtisodiyot vazirligi Toshkentdagi “buxanka” nonning oshishini, avval juda arzonligi va shu sabab nonni qo‘y va mol uchun sotib olish ko‘payib ketganini ma’lum qildi. Monopoliyaga qarshi kurashish qo‘mitasi esa “buxanka” nonning narxi oshganiga munosabat bildirib, “buxanka” non narxi Toshkent shahrida eng yuqori — 2800 so‘m, Qashqadaryoda viloyatida eng past — 1650 so‘m, respublika bo‘yicha o‘rtacha narx esa 2250 so‘mdan sotilayotganini ochiqladi.
Izoh (0)