2022-yilning aprel boshlarida Moskvada o‘zbekistonlik va tojikistonlik migrantlar o‘rtasida ommaviy mushtlashuv yuz bergani to‘g‘risida xabar berilgandi. “Gazeta.ru”ning Troiskiy sudiga tayanib ma’lum qilishicha, mazkur mushtlashuvda ishtirok etgan yuzdan ortiq O‘zbekiston va Tojikiston fuqarolari Rossiyadan deportatsiya qilinadi.
Sud ma’lumotlariga ko‘ra, migrantlarni Xorijiy fuqarolarni vaqtincha saqlash markaziga joylashtirish bo‘yicha 107 ta qaror qabul qilingan. Fuqarolar u yerda 90 kun bo‘ladi va shundan so‘ng Rossiyadan deportatsiya qilinadi.
Ommaviy mushtlashuv 2022-yilning 1-aprel kuni korxonada ishlovchi ikki xodim o‘rtasida o‘zaro kelishmovchilik (biri ikkinchisini “ahmoq” deya haqorat qilgan) oqibatida yuz bergan va keyinchalik unga ikki tomondan ham ishchilar aralashib ketgan. Mojarodan so‘ng janjal ishtirokchilari ma’muriy javobgarlikka tortilgan, politsiya esa ularning mamlakatda qolish muddatini qisqartirish va deportatsiya qilishga qaror qilgan.
Bundan oldin Moskvadagi ommaviy mushtlashuvda qatnashgan muhojirlarning 46 nafari Rossiyadan deportatsiya qilingani, Rossiyaning Primorsk o‘lkasida ish beruvchi tomonidan pasportlari olib qo‘yilgan o‘zbekistonliklarga yordam berilgani, Tashqi mehnat migratsiyasi agentligi Moskvadagi ommaviy mushtlashuvlar bo‘yicha Rossiyadagi o‘zbekistonliklarga murojaat bilan chiqqani to‘g‘risida xabar berilgandi.
Izoh (0)