Toshkent viloyatida MFY raisligiga nomzod ish tajribasi ko‘pligi ro‘kach qilinib, nomzodlar safidan chiqarib tashlandi

Toshkent viloyatining Bo‘stonliq tumani “Bunyodkor” mahalla fuqarolar yig‘inida yashovchi fuqarolar 2022-yilning 19-may kuni MFY raisligi uchun bo‘lib o‘tgan saylov adolatsiz o‘tganini, u avvaldan tayyorlab qo‘yilgan tomosha bo‘lganini aytmoqda. Shu mahallada yashovchi Li Aygul esa saylov kuni nomzodi olib tashlanganini va bunga ish tajribasining ko‘pligi sabab qilib ko‘rsatilganini aytmoqda.

“Prezidentimizning jamiyatda ayollarga bo‘lgan e’tiborni kuchaytirish va gender tenglikni ta’minlash borasidagi fikrlaridan kelib chiqib, MFY raisligiga nomzodimni qo‘ydim. O‘zim ishlagan va yashayotgan mahallamni gullataman, rivojlantiraman degandim. Ammo adolatsizlik qurboni bo‘ldim. Saylovga qadar nomzodimni ro‘yxatga qo‘yib, meni yaxshi kutib olishdi. Xursand bo‘ldim, lekin saylov kuni — 2022-yilning 19-may kuni nomzodim olinganini, men saylovda qatnasha olmasligimni bildirishdi. To‘g‘risi, bu menga juda qattiq ta’sir qildi”, — deydi Li Aygul.

“MFY raisligiga saylov kuni erta tongdan hokimiyat vakillaridan uch nafar nomzod haqida so‘radim va hammasining ism-sharifini o‘qib, e’lon qilaveraymi dedim, hokimiyatdagilar e’lon qilavering, deyishdi. Shundan so‘ng birinchi nomzod o‘z dasturi haqida ma’lumot bera boshladi. Biroz o‘tib esa hokimiyat vakillari Li Aygulning nomzodi olib tashlanganini, endi unga navbat bermasligim kerakligini aytishdi. Saylov komissiyasi raisi sifatida buning sababini bilishim kerakligini so‘radim. Shunda qo‘limga tuman hokimi imzolagan xatni berishdi. Unda Li Aygulning nomzodi olinishiga uning ish tajribasi kam bo‘lmaganligi sabab qilib ko‘rsatilgan ekan. To‘g‘risi, tushunmay qoldim. Shundan so‘ng zaldagi odamlar ham to‘polon ko‘tarib, zaldan chiqib ketishdi”, — deydi Rustam Zaynutdinov.

Saylov jarayonida saylov komissiyasi raisi vazifasini bajargan Rustam akaning aytishicha, Li Aygul nomzodi sababsiz olib tashlangani bois zalda bo‘lgan 70-80 kishining 50 nafari noroziligini bildirib, saylovda ishtirok etishdan bosh tortgan va zalni tark etgan.

“Li Aygulning nomzodi hokim imzolagan hujjatga ko‘ra olib tashlanganini e’lon qilganimda zaldagi odamlar raisni hokim saylaydimi yoki odamlar, deya shovqin ko‘tara boshlashdi. Va taxminan 70-80 kishidan 50 nafari zalni tark etdi. Zalda 15 nari borsa 20 nafar odam qoldi. Eng qizig‘i hokimiyat vakillari shuncha odam bilan saylov o‘tkazib, rais saylashdi”, — deydi Rustam Zaynutdinov.

Saylov jarayonida saylov komissiyasi raisi vazifasini bajargan Rustam akaning tushuntirishicha, Li Aygulga saylovga qadar MFY raisi vazifasini bajarib turgan, MFY raisligiga nomzod Gulnora Madaminova qo‘ng‘iroq qilib, nomzodi olib tashlanganini aytgan. Shundan so‘ng Li Aygul shaxsan tuman hokimiga qo‘ng‘iroq qilib, nega bunaqa bo‘layotganini so‘ragan. Tuman hokimi esa jarayondan xabari yo‘qligini, Li Aygulning nomzodi olinmaganini, bunga aniqlik kiritish maqsadida ishchi guruh yuborishini aytgan.

“Ishchi guruh o‘sha kuni yonimga keldi va sizning nomzodingiz olinmagan, bemalol saylovda qatnashishingiz mumkin deyishdi. Ammo ertasi kuni esa nomzodim olinganini, bunga ish tajribam kam bo‘lmagani sabab qilib ko‘rsatilgani yozilgan edi”, — deydi Li Aygul.

“Hokim imzolagan xatni qo‘limga berishganida ikkinchi nomzod saylovchilarga o‘z dasturi haqida ma’lumot berayotgandi. Endi Li Aygul chiqishi kerak edi. Ammo to‘xtating, chiqarmang deyishdi. Bu esa saylovchilar e’tiroziga sabab bo‘ldi”, — deydi Rastam Zaynutdinov.

“Li Aygulning navbati kelganda u o‘z dasturi haqida saylovchilarga ma’lumot berishi kerak bo‘lgan paytda tuman hokimi imzolagan xatni o‘qib eshittirishdi. Unda Li Aygulning ish tajribasi kam bo‘lmaganligi sababli ma’qullanmadi deb o‘qishdi. Shunda biz hayron qoldik. Zaldagilar esa baqir-chaqir qilib, bu nima ahvol deyishdi. Va noroziligini oshkor qilib, zaldan chiqib ketishdi”, — deydi voqea haqida gapirib bergan Aliqul Qaratayev.

Aliqul Qaratayevning taxmin qilishicha, saylov taqdiri avvalroq hal qilib qo‘yilgan.

“Menimcha saylovga qadar rais kimligini aniqlab qo‘yishgan. Saylov jarayoni shunchaki o‘yin tariqasida o‘tkazildi. Boisi Li Aygul nomzodi olinganidan ko‘pchilik norozi bo‘lib, deyarli hamma zaldan chiqib ketsa ham 15-20 kishi bilan saylov o‘tkazishdi. Sodda qilib aytganda, xalqning ustidan kulishdi”, — deydi Aliqul aka.

Saylov jarayoni paytida jamoatchilik vakili sifatida voqealarni syomka qilgan Taxmina Joldibayevaning aytishicha, u saylov adolatli o‘tishini ta’minlash maqsadida jarayonni telefoniga tasvirga olishga uringan. Ammo hokimiyat vakillari, aynan tuman hokimining Laziz ismli o‘rinbosari unga qarshilik qilib, sudga berish bilan qo‘rqitgan.

“Laziz aka degan hokim o‘rinbosari kelib, mening blogerligim haqida litsenziyam yo‘qligini aytib, tasvirga olish ishlarimni to‘xtatishimni talab qildi. Men esa odamlar saylovdan norozi bo‘layotganini, adolatni ta’minlash maqsadida voqealarni tasvirga olayotganimni aytdim. U esa tasvirga olishni to‘xtatishimni, bu ishim uchun meni sudga berishini aytib qo‘rqitdi. Men qo‘rqqanimdan tasvirga olishni to‘xtatdim”, — deydi Taxmina Joldibayeva.

“Daryo”ning bu haqdagi so‘roviga javob bergan Bo‘stonliq tumani hokimi o‘rinbosari Laziz Tojiboyev Li Aygulning nomzodi olib tashlangani haqidagi xabar saylovdan besh kun avval saylov komissiyasi raisi Rustam Zaynutdinovga yetkazilganini aytmoqda.

Laziz Tojiboyevga ko‘ra, hokim imzolagan xatda anglashilmovchilikka yo‘l qo‘yilgan.

“Hokim imzolagan xulosa xatida nomzodning boshqaruv lavozimlarida ish tajribasi kam bo‘lmaganligi sababli nomzodi ma’qullanmadi deb adashishgan, ammo ish tajribasi kam bo‘lganligi sababli rad etilgan”, — deydi hokim o‘rinbosari.

“Daryo” voqealar rivojini kuzatishda davom etadi.