Бухорога сифати кафолатланмаган дори-дармонларнинг олиб кирилаётгани аниқланди

Бухорода тиббий буюмларни ноқонуний олди-сотдиси билан шуғулланиб, сифати кафолатланмаган дори-дармонларнинг олиб кирилаётгани аниқланди. Бу ҳақда «Дарё»га вилоят Божхона бошқармаси матбуот хизмати раҳбари Жавоҳир Исмоилов хабар берди.

Таъкидланишича, Контрабандага қарши курашиш ва божхона аудити бўлими ходимлари, ички ишлар бошқармаси ва Миллий гвардиянинг вилоятдаги бошқармаси ходимлари билан ҳамкорликда Ғиждувон туманидаги «Сармижой» чегара постида назорат тадбири ўтказилган.

Ўтказилган тезкор тадбир давомида «Сармижой» постида фуқаро К.Н. бошқарувидаги Isuzu автоуловида тегишли ҳужжатлари бўлмаган, хорижда ишлаб чиқарилган жами 63 турдаги, умумий қиймати 200 миллион сўмлик ҳар хил турдаги сифати кафолатланмаган дори воситалари олиб кирилаётгани аниқланган.

Худди шу куни «Олот» чегара божхона постида аниқланган ҳолатда қўшни давлатдан кириб келган юкли транспорт воситаси инспекцион кўрик мажмуаси орқали божхона назоратидан ўтказилган. Натижада фуқаро П.Ш. автомашинасида юк кузатув ҳужжатларида кўрсатилмаган, умумий қиймати 164 миллион сўмлик 6 ўринда, 208 ўрамдаги «Perla» ёзувли нам салфетка ва болалар тагликлари товарларини яширинча олиб ўтишга уринаётгани олди олинган.

Бундан ташқари, П.Ш. бошқарувидаги юк автомобилида юк кузатув ҳужжатларида кўрсатилганидан ортиқча умумий қиймати 96 миллион сўмлик 13 800 дона соқол олишда ишлатиладиган бритва товарлари борлиги аниқланган.

«Ноқонунийлиги етмаганидек, сифати кафолатланмаган дори-дармонларнинг олиб киришга уринишаётгани инсон саломатлигига хиёнат. Рақамларга кўра, вилоят божхона бошқармаси томонидан жорий йилнинг ўтган даври мобайнида 283 та ҳолатда, умумий қиймати 56,1 миллиард сўмлик дори-дармонлар ва товар-моддий бойликлари билан боғлиқ ҳуқуқбузарликлар аниқланди. Ҳозирги вақтда ҳолат юзасидан божхона органлари томонидан суриштирув ҳаракатлари олиб борилмоқда», – деди Жавоҳир Исмоилов.