“Narx oshishiga qarorning aloqasi yo‘q” — yopgan non nega qimmatlashganiga izoh berildi

Iste’mol bozorida sotilayotgan yopgan nonlar import undan yopilgani uchun qimmatlashmoqda. Bu haqda Moliya vazirligi departamenti mudiri To‘lqin Mirzayev “Daryo” muxbiriga bergan intervyusida ma’lum qildi.

To‘lqin Mirzayevning ta’kidlashicha, ijtimoiy tarmoqlarda yopgan nonni narxi oshib ketishiga g‘allani sotishda bozor tamoyilini joriy etishga doir prezident qarori sabab bo‘lgani haqida xabarlar tarqalgan.

“Ijtimoiy tarmoqlarda yopgan non narxi oshib ketdi, bunga shu qarorning qabul qilinishi sabab bo‘ldi, degan xabarlar yuribdi. Bu gaplarning hammasi asossiz. Chunki iste’mol bozorida sotilayotgan yopgan nonning barcha turlari import qilingan undan yopiladi. Shu sababli bu qarorning yopgan nonga hech qanday aloqasi yo‘q. Mazkur nonlarning asosiy xomashyosi, asosan, Qozog‘iston va boshqa mamlakatlardan import qilingan undir. Bunday mish-mishlar tarqalishiga ayrim noinsof tadbirkorlarning xalqimizga nisbatan bo‘lgan noto‘g‘ri harakati sabab bo‘lgan deb bilaman. Biz bu bo‘yicha qisqa muddatda o‘rganishlar o‘tkazamiz va tegishli choralar ko‘riladi”, — dedi vazirlik vakili.

Avvalroq “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi prezident qarori qabul qilingandi.