Samarqand viloyatida qurib bitkazilayotgan 26 ta obyekt sifatsiz qurilayotgani, qurilish talablariga javob bermasligi ma’lum bo‘ldi. Bu haqda “Daryo”ga viloyat holimligi axborot xizmati ma’lum qildi.
Aytilishicha, mazkur holat viloyat hokimligi ishchi guruhi tomonidan tuman va shaharlarda olib borilayotgan monitoring davomida aniqlangan.
Ta’kidlanishicha, prezident Shavkat Mirziyoyev qaroriga asosan viloyatda 2022-yilga mo‘ljallangan investitsiya dasturi doirasida 98 ta obyektda, jumladan, ta’lim, tibbiyot hamda sport muassasalarida qurilish-montaj ishlari uchun mablag‘ ajratilgan.
“O‘zing qurayotgan maktabda mening bolam, mening nevaram o‘qiydi deb qursang, sifatli qurasan. U yerda ham senga o‘xshagan, lekin sendan farq qiladigan Xudodan xabari bor, vijdoni bor, oddiy dehqonning bolasi o‘qiydi. Sen noinsofni qilayotgan ishingni qara”, — deydi viloyat hokimi Erkinjon Turdimov.
Viloyatning Qo‘shrobod tumanidagi 77-umumta’lim maktabida “Universal inshoot stroy” mas’uliyati cheklangan jamiyati tomonidan 220 o‘rinli qo‘shimcha bino barpo etilmoqda. Qurilish ishlari olib borilayotgan hudud o‘rab olinmagan. G‘ishtlar sifatsiz, tasodifiy yotqizilgan, vertikal choklar qorishma bilan to‘ldirilmagan. Ishlar sifatsiz bajarilganligiga qaramasdan buyurtmachi tomonidan ish hajmi qabul qilinib, moliyalashtirilgan.
Viloyat hokimi rahbarligidagi muhokamada shahar va tumanlarda qurilish ishlarini olib borayotgan 26 ta qurilish tashkiloti rahbarlari faoliyati tanqid ostiga olingan. Nurobod tumanidagi 16-umumta’lim maktabi uchun sport zali qurayotgan “Lazizjon stroy servise” mas’uliyati cheklangan jamiyati ham shular jumlasidan. Ular tomonidan yuqoridagi qoidabuzarliklar bilan bir qatorda, temir-beton belbog‘i loyiha talablariga zid ravishda har xil balandliklarda o‘rnatilgan. Quyma beton ishlarida kichik mexanizmlar ishlatilmagan. Armokarkaslarning aksariyatida himoya qatlami mavjud emas. Ijro hujjatlari to‘liq yuritilmagan. Qurilish ishlarida xavfsizlik choralari ko‘rilmagan. Ishchilarning maxsus kiyimlari mavjud emas.
Viloyat hokimi Erkinjon Turdimov 5-son oilaviy poliklinika binosini rekonstruksiya qilish, Samarqand shahridagi “Qorasuv” massivida 1-son tug‘ruq majmuasi va oilaviy poliklinikaning yangi binosi qurilishida qonunbuzarliklarga yo‘l qo‘yilganiga ham to‘xtalib o‘tgan.
“Yig‘ilish yakunida obyektlarda ishlarni yetarli darajada tashkil etmaganligi, belgilangan texnik nazorat ishlarini olib bormaganligi hamda o‘z vazifasiga sovuqqonlik bilan qaraganliklari uchun viloyat hokimligi ‘Yagona buyurtmachi xizmati’ injiniring kompaniyasining 5 nafar xodimlari va viloyat qurilish nazorat inspeksiyasining 2 nafar xodimlari egallab turgan vazifasidan ozod etildi.
Ayrim rahbar kadrlarga intizomiy jazo choralari qo‘llanildi. Barcha obyektlar bo‘yicha doimiy ravishda sifat nazoratini olib borib, har 3 kunda viloyat hokimligiga fotolavhalar bilan ma’lumot kiritib borishga ko‘rsatma berildi. Haftasida bir marotaba tanqidiy ruhda viloyat hokimligida masala muhokama etilishi belgilandi”, — deyiladi hokimlik tarqatgan rasmiy axborotda.
Izoh (0)