Самарқанд вилоятида қуриб битказилаётган 26 та объект сифатсиз қурилаётгани, қурилиш талабларига жавоб бермаслиги маълум бўлди. Бу ҳақда «Дарё»га вилоят ҳолимлиги ахборот хизмати маълум қилди.
Айтилишича, мазкур ҳолат вилоят ҳокимлиги ишчи гуруҳи томонидан туман ва шаҳарларда олиб борилаётган мониторинг давомида аниқланган.
Таъкидланишича, президент Шавкат Мирзиёев қарорига асосан вилоятда 2022 йилга мўлжалланган инвестиция дастури доирасида 98 та объектда, жумладан, таълим, тиббиёт ҳамда спорт муассасаларида қурилиш-монтаж ишлари учун маблағ ажратилган.
«Ўзинг қураётган мактабда менинг болам, менинг неварам ўқийди деб қурсанг, сифатли қурасан. У ерда ҳам сенга ўхшаган, лекин сендан фарқ қиладиган Худодан хабари бор, виждони бор, оддий деҳқоннинг боласи ўқийди. Сен ноинсофни қилаётган ишингни қара», — дейди вилоят ҳокими Эркинжон Турдимов.
Вилоятнинг Қўшробод туманидаги 77-умумтаълим мактабида «Универсал иншоот строй» масъулияти чекланган жамияти томонидан 220 ўринли қўшимча бино барпо этилмоқда. Қурилиш ишлари олиб борилаётган ҳудуд ўраб олинмаган. Ғиштлар сифатсиз, тасодифий ётқизилган, вертикал чоклар қоришма билан тўлдирилмаган. Ишлар сифатсиз бажарилганлигига қарамасдан буюртмачи томонидан иш ҳажми қабул қилиниб, молиялаштирилган.
Вилоят ҳокими раҳбарлигидаги муҳокамада шаҳар ва туманларда қурилиш ишларини олиб бораётган 26 та қурилиш ташкилоти раҳбарлари фаолияти танқид остига олинган. Нуробод туманидаги 16-умумтаълим мактаби учун спорт зали қураётган «Лазизжон строй сервис» масъулияти чекланган жамияти ҳам шулар жумласидан. Улар томонидан юқоридаги қоидабузарликлар билан бир қаторда, темир-бетон белбоғи лойиҳа талабларига зид равишда ҳар хил баландликларда ўрнатилган. Қуйма бетон ишларида кичик механизмлар ишлатилмаган. Армокаркасларнинг аксариятида ҳимоя қатлами мавжуд эмас. Ижро ҳужжатлари тўлиқ юритилмаган. Қурилиш ишларида хавфсизлик чоралари кўрилмаган. Ишчиларнинг махсус кийимлари мавжуд эмас.
Вилоят ҳокими Эркинжон Турдимов 5-сон оилавий поликлиника биносини реконструкция қилиш, Самарқанд шаҳридаги «Қорасув» массивида 1-сон туғруқ мажмуаси ва оилавий поликлиниканинг янги биноси қурилишида қонунбузарликларга йўл қўйилганига ҳам тўхталиб ўтган.
«Йиғилиш якунида объектларда ишларни етарли даражада ташкил этмаганлиги, белгиланган техник назорат ишларини олиб бормаганлиги ҳамда ўз вазифасига совуққонлик билан қараганликлари учун вилоят ҳокимлиги ‘Ягона буюртмачи хизмати’ инжиниринг компаниясининг 5 нафар ходимлари ва вилоят қурилиш назорат инспекциясининг 2 нафар ходимлари эгаллаб турган вазифасидан озод этилди.
Айрим раҳбар кадрларга интизомий жазо чоралари қўлланилди. Барча объектлар бўйича доимий равишда сифат назоратини олиб бориб, ҳар 3 кунда вилоят ҳокимлигига фотолавҳалар билан маълумот киритиб боришга кўрсатма берилди. Ҳафтасида бир маротаба танқидий руҳда вилоят ҳокимлигида масала муҳокама этилиши белгиланди», — дейилади ҳокимлик тарқатган расмий ахборотда.
Изоҳ (0)