Andijon o‘tgan 3 oyda korrupsion jinoyatlar eng ko‘p sodir etilgan viloyat bo‘ldi

Korrupsiyaga oid jinoyatlar sodir qilish bo‘yicha Andijon viloyati o‘tgan 3 oyda respublika miqyosida eng yuqori o‘rinlarni egalladi. Bu haqda Korrupsiyaga qarshi kurashish agentligi xabar berdi.

Ma’lum qilinishicha, korrupsiyaga oid jinoyatlar sodir qilish bo‘yicha Andijon viloyati o‘tgan 3 oyda eng yuqori o‘rinlarni egallagan. O‘zbekiston prezidenti virtual qabulxonasi va Xalq qabulxonalariga aholisi korrupsiya bo‘yicha eng ko‘p murojaat qiladigan hududlar ichida respublikada 1-o‘rinni band etmoqda.

Viloyat Korrupsiyaga qarshi hududiy kengashining navbatdagi yig‘ilishida korrupsiyaga qarshi kurashish va uning oldini olish tizimini tubdan qayta ko‘rib chiqish kerakligi muhokama qilingan.

Tahlillarga ko‘ra, 2021-yilda 22 nafar shaxsga nisbatan 18 ta jinoyat ishi sudga yuborilgan. Ular o‘zlashtirish, firibgarlik, mansab vakolatini suiiste’mol qilish hamda pora olish kabi jinoyatlarni sodir qilgan. Mazkur jinoyatlarga qo‘l urganlarning 4 nafari viloyat hokimligi, 18 nafari tuman va shahar hokimliklarining xodimlari hisoblanadi.

“Bir oydan so‘ng 2022-yilning birinchi yarim yilligi bo‘yicha hududlar xuddi shunday baholanadi va barcha natijalar ommaviy axborot vositalarida e’lon qilinib, Milliy kengash yig‘ilishida muhokama qilinadi. Lekin bu davrda ham viloyat hududiy kengashi tomonidan ijobiy natija ko‘rsatish uchun arzirli amaliy ish yoki tashabbusni ko‘rmayapmiz. Kengash a’zolari korrupsiyaga qarshi kurashish borasida a’zo sifatidagi mas’uliyatni qanchalik his qilmoqda, viloyatda, o‘z tizimida korrupsiyani kamaytirish uchun qay darajada harakat qilmoqda – bu kabi savollarni kengashning har bir a’zosi o‘ziga qayta va qayta berishi kerak, deb o‘ylayman”, — dedi Korrupsiyaga qarshi kurashish agentligi direktori o‘rinbosari Umida To‘xtasheva.

Avvalroq Antikorrupsiya agentligi ochiqlikka oid qonunchilik talablariga rioya etmagan 8 ta mahalliy hokimlikka ogohlantirish yuborgani, O‘zbekistonda 1-sentabrdan “E-antikorrupsiya” loyihasi ishga tushirilishi to‘g‘risida xabar berilgandi.