“Roskosmos” katta ko‘lamli orbital guruhni ishga tushirishni rejalashtirmoqda, u doimiy asosda Ukrainadagi jangovar harakatlar ustidan kuzatuv olib borish imkonini beradi. Bu haqda davlat korporatsiyasi rahbari Dmitriy Rogozin ma’lum qildi, deb yozadi “Interfaks”.
“Hozir biz uchun asosiy mavzu — bu keng ko‘lamli orbital guruhni ishga tushirish. Biz ‘oziqlanish zanjiri’ni to‘liq tizib chiqmoqchimiz. Sun’iy yo‘ldoshlar qanchalik ko‘p bo‘lsa, bu bugun armiya uchun shunchalik muhim. U deyarli 24 soat rejimida ko‘rishi, eshitishi, Ukraina hududidagi harbiy harakatlar teatrini doimiy kuzatib borishi kerak”, — dedi Rogozin.
Sun’iy yo‘ldoshlardan harbiy maqsadlardan tashqari, oddiy vazifalarda ham foydalanish mumkin bo‘ladi, dedi “Roskosmos” rahbari. “Bizga sun’iy yo‘ldoshlar kerak, hozir bizda 161 ta kosmik qurilma bor, mudofaa vazirligi qurilmalari ham shuning ichiga kiradi, bu kam, mingta bo‘lishi kerak”, — deya qo‘shib qo‘ydi u.
1-mart kuni Rogozin AQSH va Yevroittifoq bilan qo‘shma loyihalar bekor qilinishi tufayli bo‘shagan manbalar “faqat mudofaa maqsadidagi va qo‘sh vazifali kosmik tizimlar yaratishga” yo‘naltirilishini aytgandi. Keyinroq u yaqin kelajakda Rossiyada yaratiladigan barcha kosmik qurilmalar qo‘sh maqsadli bo‘lishini ma’lum qildi.
Izoh (0)