AQSH prezidenti Jo Baydenning ikki maslahatchisi neft qazib chiqarishni oshirish ehtimoli va boshqa bir qator masalalar bo‘yicha maxfiy muzokaralar o‘tkazish yuzasidan Saudiya Arabistonida tashrif bilan bo‘lib turibdi. Bu haqda Axios portal o‘z manbalariga tayanib xabar berdi.
Yaqin Sharq va Shimoliy Afrika bo‘yicha muvofiqlashtiruvchi Brett Makgerk va Davlat departamentining global energetika xavfsizligi masalalari bo‘yicha katta maslahatchisi Amos Xoxshteyn Ar-Riyodga 24-may, seshanba kuni kelgan.
Axios ma’lumotlariga ko‘ra, Bayden ma’muriyati Ar-Riyod va Quddus munosabatlarini normallashtirish bo‘yicha Saudiya Arabistoni, Isroil va Misr o‘rtasidagi muzokaralarda vositachilik qilmoqda. Gap, xususan, Misr tomonidan Saudiya Arabistoniga Qizil dengizda joylashgan Tiran va Sanafir orollarining berilishi haqida bormoqda.
Shu bilan birga, Amerika tomoni Ar-Riyoddan neft qazib chiqarishni kechaytirishni so‘ramoqda. Shu tariqa, Bayden AQSHdagi oraliq saylovlar oldidan gaz narxini pasaytirishga va Rossiya neftiga qarshi sanksiyalar kengaytirilishiga erishishga umid qilmoqda.
Amerika yetakchisi iyun oxiriga rejalashtirilgan Yaqin Sharqqa safarlar doirasida Saudiya Arabistoniga tashrif buyurish imkoniyatini ko‘rib chiqmoqda. Ushbu masalalar bo‘yicha AQSH va Saudiya Arabistoni o‘rtasida kelishuvlar bo‘lish-bo‘lmasligiga qarab Ar-Riyodga tashrif qarori aniq bo‘ladi.
Avvalroq neftning rekord darajada qimmatlashuvi fonida Oq uy Saudiya Arabistoni va Birlashgan Arab Amirliklari bilan munosabatlarini qayta tiklashga urinib ko‘rgan edi. Mart boshida prezident Jo Bayden, Saudiya shahzodasi Muhammad ibn Salmon va BAA shayxi Muhammad ibn Zayd al Nahayyon bilan telefon suhbatini tashkil qilishga urinishgan, ammo bu amalga oshmay qolgan.
Keyinroq Saudiya Arabistoni AQSHning jahon bozorida narx tushishiga erishish uchun xomashyo qazib olishni oshirish iltimosini e’tiborsiz qoldirganidan keyin, Vashington bu g‘oyadan voz kechgan. Endi esa AQSH Saudiya Arabistoni “G‘arbning Ukrainadagi sa’y-harakatlariga zarar keltirishi mumkin bo‘lgan xatti-harakatlarni amalga oshirmasligini” istayapti. Ar-Riyoddagi manbalarga ko‘ra, AQSH mamlakatning Rossiya yoki Xitoy bilan yaqin hamkorligidan xavfsiramoqda.
Izoh (0)