Россия Украинадаги ҳарбий ҳаракатларни кузатиб бориш учун мингта сунъий йўлдошни ишга туширади

«Роскосмос» катта кўламли орбитал гуруҳни ишга туширишни режалаштирмоқда, у доимий асосда Украинадаги жанговар ҳаракатлар устидан кузатув олиб бориш имконини беради. Бу ҳақда давлат корпорацияси раҳбари Дмитрий Рогозин маълум қилди, деб ёзади «Интерфакс».

«Ҳозир биз учун асосий мавзу — бу кенг кўламли орбитал гуруҳни ишга тушириш. Биз ‘озиқланиш занжири’ни тўлиқ тизиб чиқмоқчимиз. Сунъий йўлдошлар қанчалик кўп бўлса, бу бугун армия учун шунчалик муҳим. У деярли 24 соат режимида кўриши, эшитиши, Украина ҳудудидаги ҳарбий ҳаракатлар театрини доимий кузатиб бориши керак», — деди Рогозин.

Сунъий йўлдошлардан ҳарбий мақсадлардан ташқари, оддий вазифаларда ҳам фойдаланиш мумкин бўлади, деди «Роскосмос» раҳбари. «Бизга сунъий йўлдошлар керак, ҳозир бизда 161 та космик қурилма бор, мудофаа вазирлиги қурилмалари ҳам шунинг ичига киради, бу кам, мингта бўлиши керак», — дея қўшиб қўйди у.

1 март куни Рогозин АҚШ ва Евроиттифоқ билан қўшма лойиҳалар бекор қилиниши туфайли бўшаган манбалар «фақат мудофаа мақсадидаги ва қўш вазифали космик тизимлар яратишга» йўналтирилишини айтганди. Кейинроқ у яқин келажакда Россияда яратиладиган барча космик қурилмалар қўш мақсадли бўлишини маълум қилди.