AQSHda Starliner kosmik kemasining sinov parvozi muvaffaqiyatli yakunlandi

19-may kuni koinotga uchirilgan CST-100 Starliner kosmik kemasi Amerikaning Nyu-Meksiko shtatiga kelib qo‘ndi, deb yozadi “RBK” AQSH Aeronavtika va fazoni tadqiq qilish milliy boshqarmasi (NASA)ga tayanib.

Bu kemaning ekipajsiz holda amalga oshirilgan ikkinchi sinov parvozi bo‘ldi. Qo‘nish uchta parashyut va oltita xavfsizlik yostiqlari yordamida amalga oshirildi. Kelajakda kemani bortida kosmonavtlar bilan birga uchirish rejalashtirilmoqda.

Parvoz 19-may kuni United Launch Alliance Atlas V raketasida Florida shtati hududidan amalga oshirilgan edi. Starliner 20-may kuni Xalqaro koinot stansiyasi modullaridan biriga muvaffaqiyatli tarzda borib tutashgan, besh kundan keyin esa Yerga qaytish uchun uzilib chiqqan edi.

Kema orqali XKSdagi astronavtlar uchun 360 kg foydali yuklar yetkazildi. Komandir o‘rnini “Rozi Roketir” odamsimon sinov qurilmasi egalladi, u 15 ta datchik yordamida kelajakda astronavtlar boshidan o‘tkazishiga to‘g‘ri keladigan yuklamalarni o‘lchab borgan.

Starliner 2014-yildan buyon NASA tomonidan Boeing kompaniyasi bilan hamkorlikda Uchuvchi tomonidan boshqariluvchi tijorat kemalarini rivojlantirish dasturi doirasida ishlab chiqilmoqda. Birinchi sinov parvozi 2019-yil dekabrida bo‘lib o‘tgan, o‘shanda dasturiy ta’minot nosozligi tufayli XKSga tutashuv amalga oshmagan edi. 2021-yilda Boeing kompaniyasi dvigatellar nosozligi sababli Starliner kemasi parvozini kechiktirdi.

Ikkinchi sinov parvozidan sal avvalroq “Roskosmos” rahbari Dmitriy Rogozin rossiyalik kosmonavtlar Starliner’da uchmasligini ma’lum qilgandi. “Endi uni uchirishga urinib ko‘rishadi, ammo unga biz kosmonavtlarimizdan hech kimni chiqarmaymiz, bu aniq. Biz ularning hayotini xavf ostiga qo‘ya olmaymiz”, — dedi u.