AQSH va Yaponiya qiruvchi samolyotlari Yapon dengizi osmonida birgalikdagi parvozni amalga oshirdi

Yaponiya va Amerika aviatsiyasining sakkizta qiruvchi samolyoti Yapon dengizi osmonida birgalikdagi parvozni amalga oshirdi, deb yozadi “RBK”.

Yaponiya harbiy idorasi ma’lumotlariga ko‘ra, parvozda Yaponiya tomonidan F15 qiruvchilari, AQSH tomonidan esa F16 qiruvchilari qatnashgan. Parvoz amalga oshirilishi sabablaridan biri sifatida 25-may kuni Shimoliy Koreya tomonidan ballistik raketalar uchirilgani tilga olindi. “Biz mintaqada tinchlik va barqarorlikka imkoniyat yaratish uchun pozitsiyamizni va imkoniyatlarimizni qo‘llab-quvvatlaymiz va mustahkamlaymiz”, — deyiladi Yaponiya Mudofaa vazirligi xabarida.

Ayni vaqtda, BMT Xavfsizlik kengashi ballistik raketalar parvozi uchun Shimoliy Koreyaga nisbatan sanksiyalarni kuchaytirishni ko‘zda tutuvchi, AQSH tomonidan taklif qilingan rezolyutsiya loyihasini ko‘rib chiqishni rejalashtirmoqda.

AQSH prezidenti Jo Baydenning Seul va Tokioga tashrifi hamda Quad sammiti (Avstraliya, AQSH, Hindiston va Yaponiya ishtirokidagi xavfsizlik bo‘yicha to‘rt tomonlama muloqot)dan keyin KXDR Yapon dengiziga qarata uchta raketa uchirgan edi. Yaponiya buni Shimoliy Koreya tomonidan ochiq-oydin provokatsiya deb atadi.

Janubiy Koreya harbiylari KXDRning ushbu xatti-harakatlariga javoban, “Xenmu-2” ballistik raketalarini uchirdi, AQSH esa Yapon dengiziga qarata bitta ATACMS snaryadini uchirdi. Shu tariqa ittifoqchilar ittifoq kuchlari tomonidan “zudlik bilan zarba berilishi” imkoniyatlarini ko‘z-ko‘z qilgan.

Ta’kidlash joiz, Quad sammiti chog‘ida Rossiya va Xitoy harbiy samolyotlari faolligi ham kuzatilgandi. Yaponiya mudofaa vazirligi ma’lumotlariga ko‘ra, 24-may kuni Xitoy va Rossiyaning ikkitadan bombardimonchilari birgalikda Yapon dengizi ustidan uchib o‘tib, so‘ng Sharqiy Xitoy dengizi tomonga yo‘l olgan. Shuningdek, Yapon dengizi osmonida Rossiya razvedka samolyoti ham ko‘ringan.

Shu munosabat bilan Yaponiya hukumati Rossiyaga norozilik e’lon qildi, ammo Rossiya TIV uni rad etib, Xitoy bilan birgalikdagi parvozlar xalqaro huquq qoidalariga qat’iy rioya qilingan tarzda o‘tkazilishini ta’kidladi.