19 май куни коинотга учирилган CSТ-100 Starliner космик кемаси Американинг Нью-Мексико штатига келиб қўнди, деб ёзади «РБК» АҚШ Аэронавтика ва фазони тадқиқ қилиш миллий бошқармаси (NASA)га таяниб.
Бу кеманинг экипажсиз ҳолда амалга оширилган иккинчи синов парвози бўлди. Қўниш учта парашют ва олтита хавфсизлик ёстиқлари ёрдамида амалга оширилди. Келажакда кемани бортида космонавтлар билан бирга учириш режалаштирилмоқда.
Парвоз 19 май куни United Launch Alliance Аtlas V ракетасида Флорида штати ҳудудидан амалга оширилган эди. Starliner 20 май куни Халқаро коинот станцияси модулларидан бирига муваффақиятли тарзда бориб туташган, беш кундан кейин эса Ерга қайтиш учун узилиб чиққан эди.
Кема орқали ХКСдаги астронавтлар учун 360 кг фойдали юклар етказилди. Командир ўрнини «Рози Рокетир» одамсимон синов қурилмаси эгаллади, у 15 та датчик ёрдамида келажакда астронавтлар бошидан ўтказишига тўғри келадиган юкламаларни ўлчаб борган.
Starliner 2014 йилдан буён NASA томонидан Boeing компанияси билан ҳамкорликда Учувчи томонидан бошқарилувчи тижорат кемаларини ривожлантириш дастури доирасида ишлаб чиқилмоқда. Биринчи синов парвози 2019 йил декабрида бўлиб ўтган, ўшанда дастурий таъминот носозлиги туфайли ХКСга туташув амалга ошмаган эди. 2021 йилда Boeing компанияси двигателлар носозлиги сабабли Starliner кемаси парвозини кечиктирди.
Иккинчи синов парвозидан сал аввалроқ «Роскосмос» раҳбари Дмитрий Рогозин россиялик космонавтлар Starliner’да учмаслигини маълум қилганди. «Энди уни учиришга уриниб кўришади, аммо унга биз космонавтларимиздан ҳеч кимни чиқармаймиз, бу аниқ. Биз уларнинг ҳаётини хавф остига қўя олмаймиз», — деди у.
Мавзуга доир:
- Crew Dragon астронавтлари Халқаро космик станцияга етиб борди. Энди станциядагилар 11 киши бўлди (видео)
- Crew Dragon «Союз»дан яхшироқми? «Роскосмос» инқирозга учрайдими? Энди русларнинг янги кемалари ХКСга учмайдими? — SpaceX муваффақиятидан кейинги космонавтика ҳақида
- Космик пойгада ғолиб чиқаётган Илон Маск. У буни қандай уддалайди?
Изоҳ (0)