Nyu-Yorkda qurol ishlab chiqaruvchilarini sudga berish mumkin bo‘ldi

Nyu-Yorkda federal sud qurol ishlab chiqaruvchilarga qarshi da’vo kiritishga ruxsat berdi, deb yozadi “RIA Novosti”.

Nyu-York federal sudi chiqargan qarorga muvofiq, otishma bilan bog‘liq hodisalarga aloqadorlikda taxmin qilib, o‘qotar qurollar ishlab chiqaruvchilariga qarshi sud da’volarini berish mumkin bo‘ldi.

“Federal sudi idoramning qurol ishlab chiqaruvchilarini qurol tomonidan yetkazilayotgan vayronkor oqibatlar tufayli javobgarlikka tortish huquqini tasdiqlagani katta g‘alabamiz bo‘ldi”, — deb yozdi shtat bosh prokurori Letitsiya Jeyms o‘z Twitter’ida.

Uning so‘zlariga ko‘ra, AQSH hukumati “o‘qotar qurol ishtirokidagi zo‘ravonlikka nuqta qo‘yib, ushbu o‘lim va vayronkorlik quroli uchun mas’ul bo‘lgan qudratli kuchlarga qarshi turish” uchun qo‘l ostidagi barcha vositalarni ishga solishi kerak.

Nyu-York sudi qarori Texas shtati Yuvald shahridagi boshlang‘ich maktablardan birida sodir etilgan otishma fonida chiqarildi. Uning oqibatida 21 kishi halok bo‘lib, yana kamida 17 kishi yaralangan edi.

AQSH prezidenti Jo Bayden otishmadan keyin kongressga yo‘llagan murojaatida qurol lobbisiga qarshi kurashib, qurol bo‘yicha qonunchilikka qo‘shimcha cheklovlar kiritish zarurligini aytdi.

“Mamlakat sifatida biz qachon qurol lobbisiga qarshi chiqamiz, deb so‘rashimiz kerak. Men bundan charchadim. Biz harakatga o‘tishimiz kerak. Biz bu qirg‘inga ta’sir qila olmaymiz deb menga aytmang”, — dedi Bayden.

Associated Press qayd etishicha, Yuvalddagi otishma qurbonlar soni bo‘yicha so‘nggi o‘n yildagi eng ommaviysi bo‘ldi. 2012-yil 14-dekabr kuni Konnektikut shtatidagi Sendi-Xuk maktabida yuz bergan otishmada 20 nafar bola va olti nafar katta yoshlilar halok bo‘lgandi.