Bayden maymunchechakning tarqalishini xavotirli deb atadi

AQSH prezidenti Jo Baydenning aytishicha, maymunchechak epidemiyasi xavotir uyg‘otmoqda, chunki uning tarqalishi oqibatsiz bo‘lmaydi. Bu haqda u Yaponiyaga uchishidan oldin Janubiy Koreyadagi jurnalistlarga gapirdi, deb yozmoqda USA Today.

Uning ta’kidlashicha, AQSH nima qilish kerakligi va bunday holatda qanday vaksina zarurligini aniqlash uchun “qattiq ishlamoqda”.

Maymunchechak birinchi marta 1958-yilda aniqlangan, aksariyat hollarda Afrikada qayd etilgan. Keyingi epidemiyalar 2003-yilda AQSHda, 2017-yilda Nigeriyada kuzatilgan. Kasallikning inkubatsiya davri odatda olti kundan 13 kungacha davom etadi. Quyidagi alomatlar kuzatilishi mumkin: o‘tkir toshma toshishi, bosh og‘rig‘i, haroratning 38,5 darajadan oshishi, limfa tugunlarining kengayishi, orqa, mushaklar va tanadagi og‘riqlar, holsizlanish.

Maymunchechakning yangi epidemiyasi 2022-yilning may oyida boshlandi. Birinchi kasallikka chalinish holati Buyuk Britaniyada 7-may kuni Nigeriyadan qaytgan erkakda aniqlandi. 21-may kuni Jahon sog‘liqni saqlash tashkiloti maymunchechak bilan kasallangan 92 nafar bemor haqida xabar berdi. Ushbu kasallikdan o‘lim holatlari hali qayd etilmagan.

13-maydan boshlab Avstraliya, Belgiya, Kanada, Fransiya, Germaniya, Italiya, Niderlandiya, Portugaliya, Ispaniya, Shvetsiya, Buyuk Britaniya, Shveysariya, Isroil va AQSHda maymunchechak bilan kasallanish holatlari tasdiqlandi.