Shveysariya hamda Isroilda maymunchechak bilan kasallanish bo‘yicha bittadan holatlar kuzatildi. Bu haqda mahalliy Tages-Anzeiger hamda N12 News nashrlari xabar tarqatgan.
Shveysariya poytaxti Bernda mahalliy sog‘liqni saqlash boshqarmasi maymunchechak bilan kasallanish holati qayd etilganini ma’lum qilgan. Taxminlarga ko‘ra, bemor xorijdan mazkur kasallikni orttirib, mamlakatga qaytgan va izolyatsiyaga olingan.
Isroilda maymunchechakka chalingan 30 yoshli bemor ham, G‘arbiy Yevropada kasallanib, mamlakatga qaytib kelgan. Unda kasallik yengil kechmoqda va u ham o‘zni yakkalash tartibiga o‘tkazilgan.
Isroil Sog‘liqni saqlash vazirligining pandemiyaga qarshi kurash guruhi vakili Arnon Shahar ayni vaqtda maymunchechak kasalligining koronavirus pandemiyasi kabi keng tarqalish xavfi yo‘qligini ta’kidlagan. Shunga qaramay, vazirlik odamlar orasida mazkur kasallikka chalinish bilan bog‘liq birinchi holat kuzatilgani tufayli favqulodda yig‘ilish o‘tkazgan.
May oyida butun dunyoda maymunchechak kasalligi tarqala boshladi. Kasallikka chalinish bilan bog‘liq birinchi holat 7-mayda Buyuk Britaniyada Nigeriyadan qaytgan fuqaroda qayd etilgan. 21-mayda Jahon sog‘liqni saqlash tashkiloti (JSST) butun dunyoda maymunchechakka chalinish bilan bog‘liq 80 ta holat kuzatilganini xabar qildi. JSST qayd etilgan holatlar noodatiy ekanligi, maymunchechak noendemik mamlakatlarda kuzatilayotganiga e’tibor qaratgan.
Maymunchechak — ilk bor 1958-yilda qayd etilgan yuqumli kasallik hisoblanadi. Asosan Afrika mamlakatlarida keng uchragan. Qit’adan tashqarida maymunchechak bilan kasallanishning dastlabkisi 2003-yilda AQSHda kuzatilgan. Eng oxirgi epidemiya 2017-yilda Nigeriyada bo‘lgan.
Shuningdek, 2022-yilda Ispaniya (30 ta holat), Portugaliya (23 ta holat), Italiya va Germaniya (3 tadan holatlar), Belgiya (2 ta holat), Niderlandiya, Fransiya, AQSH, Kanada, Avstraliyada bittadan holatlar qayd etilgan. Buyuk Britaniyada esa 11 ta yangi kasallanish holatlari kuzatilgan.
Izoh (0)