Maymunchechak bilan kasallanish darajasi yoz faslida ommaviy tadbirlar o‘tkazilishi tufayli o‘sishi mumkin. Bu haqda Jahon sog‘liqni saqlash tashkiloti (JSST) Yevropa mintaqaviy byurosi direktori Xans Klyuge ma’lum qildi, deb yozadi “Interfaks”.
“Biz Yevropada yoz mavsumiga yaqinlashyapmiz, u ommaviy yig‘inlar, festivallar va ziyofat kechalaridan iborat bo‘ladi. Virus tarqalishi tezlashishi mumkinligidan xavotirdaman”, — dedi Klyuge.
Uning aytishicha, Yevropa mintaqasidagi kamida sakkizta mamlakat so‘nggi bir necha kun ichida maymunchechak holatlari aniqlangani haqida xabar bergan. Yevropadan tashqarida esa virus Avstraliya, Kanada va AQSHda qayd etilgan.
Niderlandiyada ham bir necha kishi maymunchechakka chalingani taxmin qilinmoqda, ular ayni paytda mutaxassislar tomonidan tekshirilmoqda.
Shu hafta Yevropada maymunchechak kasalligiga chalinish bilan bog‘liq 100 dan ortiq holat aniqlandi. Germaniya hukumati ushbu kasallikning avj olishi Yevropa mintaqasida har qachongidan eng yirigi deb hisoblash mumkinligini aytdi.
Agar odam tabiiy chechakka qarshi vaksina olgan bo‘lsa, maymunchechak kasalligi og‘ir o‘tishi ehtimoli kamayadi. Virus odatda odamga yovvoyi hayvonlardan yuqadi, odamdan odamga yuqish holatlari cheklangan xususiyatga ega. Bu haqda “Rospotrebnadzor” (Iste’molchilar huquqlarini himoya qilish va inson farovonligi sohasidagi nazorat bo‘yicha federal xizmat) ma’lum qildi.
“Maymunchechakni davolash yoki unga qarshi vaksinaning alohida turlari yo‘q, ammo bu kasallikning avj olishini nazorat qilish mumkin. Maymunchechak profilaktikasi uchun tabiiy chechakka qarshi vaksina samaradorligi ilgari 85 foizga yetgan, ammo butun dunyoda tabiiy chechak to‘liq yo‘q qilingani tufayli, endi aholining asosiy qismida ushbu vaksinadan foydalanish imkoniyati yo‘q. Shunga qaramay, ilgari tabiiy chechakka qarshi emlangan bo‘sa, kasallik unchalik og‘ir kechmasligi mumkin”, — deyiladi “Rospotrebnadzor” xabarida.
Maymunchechak — kamyob yuqumli kasallik bo‘lib, asosan Markaziy va G‘arbiy Afrikaning olis tumanlarida eng ko‘p tarqalgan. Uning belgilari — ko‘ngil aynishi, isitma, toshma, qichishish, shuningdek, mushaklardagi og‘riq. Bu mintaqadan tashqaridagi kasallanish holatlari ko‘pincha epidemiologiya nuqtai nazaridan noqulay bo‘lgan zonalarga safarlar bilan bog‘liq bo‘ladi.
Virus kontakt orqali yuqadi, ammo uning tarqalish darajasi yuqori emas.
Izoh (0)