Jizzaxda 1,3 mlrd so‘m, Qashqadaryoda esa 400 mln so‘m kredit mablag‘larining talon-toroj qilish holatlari aniqlandi

Bosh prokuratura huzuridagi departament organlari tomonidan banklarning komplayens-nazorati tuzilmalari bilan hamkorlik doirasida pul mablag‘larining talon-toroj qilinishi bo‘yicha aniqlangan qonunbuzilish holatlari yuzasidan qonuniy choralar ko‘rilmoqda. Bu haqda departament matbuot xizmati xabar berdi.

Xususan, Sharof Rashidov tumanida ATB “Qishloqqurilishbank” Jizzax hududiy boshqarmasining murojaatiga asosan tergovga qadar tekshiruv o‘tkazilgan. Tekshiruvda, “E.D.” MCHJga bank filialidan g‘isht mahsulotlari ishlab chiqarish uskunalarini sotib olish uchun ajratilgan 1,3 milliard so‘m kredit mablag‘ini o‘zi rahbarlik qilib kelayotgan boshqa korxonalariga o‘tkazib olish yo‘li bilan mablag‘larni talon-toroj qilgani aniqlangan.

Shuningdek, Qashqadaryo viloyati Muborak tumanidagi “V.L.” MCHJ norasmiy rahbari U.Ya. ATB “Mikrokreditbank” Muborak filialidan garov ta’minoti sifatida ko‘rsatilgan texnikalarni 660 millionn so‘mga qimmat baholatish orqali ishlab chiqarish dastgohlari va metall mahsulotlari sotib olish uchun ajratilgan 400 million so‘m kredit mablag‘ini naqdlashtirib olib, talon-toroj qilgan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Buxoro, Farg‘ona va Sirdaryo viloyatlarida kredit mablag‘larini talon-toroj qilish holatlari aniqlangani, Bekobodda yo‘l ta’mirlash uchun ajratilgan 738 tonna mahsulotni qariyb 1 mlrd so‘mga sotib yuborgan mansabdorlar ushlangani, Surxondaryoda non ishlab chiqarish sexi va do‘kon qurish uchun ajratilgan 2 mlrd so‘m kreditni o‘zlashtirgan tadbirkor qo‘lga olingani to‘g‘risida xabar berilgandi.