Shavkat Mirziyoyev 19-may kuni Qirg‘iziston prezidenti Sadir Japarov bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, muloqotda O‘zbekiston va Qirg‘iziston o‘rtasidagi do‘stlik, yaxshi qo‘shnichilik va strategik sheriklik munosabatlarini mustahkamlashning dolzarb masalalari ko‘rib chiqilgan. Turli darajalarda o‘zaro muloqot va almashinuvlar faollashgani mamnuniyat bilan qayd etilgan.
Erishilgan kelishuvlarni amalga oshirish hamda beshta muhim yo‘nalish — davlat chegarasiga oid masalalarda, savdo-sotiqni ko‘paytirish, sanoat kooperatsiyasini kengaytirish, transport va energetika sohalarida qo‘shma infratuzilma loyihalarini ilgari surish borasidagi amaliy hamkorlikda aniq natijalarga erishishga alohida e’tibor qaratilgan. Mintaqaviy muloqot masalalari muhokama qilingan. Markaziy Osiyo davlatlari rahbarlarining navbatdagi Maslahat uchrashuvi kun tartibini har tomonlama tayyorlash muhimligi qayd etilgan.
Yetakchilar ikki va ko‘p tomonlama tadbirlar rejasini ham ko‘rib chiqqan.
Shavkat Mirziyoyev—Sadir Japarov
Shavkat Mirziyoyev 26-may kuni Qirg‘izistonga tashrif buyuradi. Shu kuni Qozog‘iston rahbari To‘qayev ham keladi. Bu haqda Sadir Japarov mahalliy nashrga bergan intervyusida aytib o‘tgan: “Har narsaning o‘z vaqti bor. Birorta prezident yurtimizga tashrif buyurmagani haqida gapirayotganlarga aytmoqchiman — sabr qiling, hammasi keladi”.
Shavkat Mirziyoyev 8-aprel kuni ham Qirg‘iziston prezidenti bilan telefon orqali muloqot qilgan. Davlat rahbarlari Xitoy—Qirg‘iziston—O‘zbekiston temiryo‘lini qurish bo‘yicha infratuzilmaviy loyihalari bo‘yicha fikr almashgan.
2021-yilning martida Sadir Japarov davlat tashrifi bilan O‘zbekistonga kelgandi. O‘shanda Ko‘ksaroy qarorgohida prezident Sadir Japarov va O‘zbekiston prezidenti Shavkat Mirziyoyevning rasmiy uchrashuv marosimi bo‘lib o‘tgandi, shundan so‘ng davlat rahbarlari tor va kengaytirilgan tarkibda ikki tomonlama muzokaralar o‘tkazdi. Muzokaralar yakunida ikki mamlakat prezidentlari qo‘shma bayonotni qabul qilgan. Unda ochiq, do‘stona va konstruktiv muhitda o‘tgan muzokaralar samarali bo‘lganligi qayd etilgan edi.
Izoh (0)