Afg‘onistonning Energetika va suv vazirligi O‘zbekiston va Tojikistondan import qilinadigan elektr energiyasi uchun 100 million dollardan ortiq qarzi borligini ma’lum qildi, deb xabar beradi TOLOnews nashri.
Energetika va suv vazirligi matbuot kotibi Axtar Muhammad Nusratning aytishicha, hozirda Markaziy Osiyo davlatlari, xususan, O‘zbekiston va Tojikiston banklari pul o‘tkazishda qiyinchiliklarni boshdan kechirmoqda, bu esa Afg‘oniston “Milliy elektr kompaniyasi”ga qarzlarini to‘lashiga to‘sqinlik qilmoqda. Uning ma’lum qilishicha, vazirlik elektr energiyasi uchun pul to‘lashga harakat qilyapti.
“O‘zbekistonning o‘z muammolari bor, biz to‘lamoqchimiz, lekin muammo banklarda”, — deydi Axtar Muhammad Nusrat.
“Milliy elektr kompaniyasi”ning sobiq rahbari Omonulla G‘olibning aytishicha, Afg‘oniston Markaziy Osiyo mamlakatlariga, xususan, O‘zbekistonga elektr energiyasi sotib olish uchun yiliga 300 million dollarga yaqin pul to‘laydi. “Afg‘oniston elektr energiyasining katta qismini O‘zbekistondan sotib oladi. Yiliga taxminan 108 million dollarga. Endi muammo hisob-kitoblarni to‘lashda”, — deydi u. Omonulla G‘olib, shuningdek, Ukrainadagi vaziyat qo‘shni davlatlarning bank faoliyatini murakkablashtirganini qo‘shimcha qilgan.
O‘zbekiston Energetika vazirligi matbuot xizmatining “Daryo” so‘roviga asosan ma’lum qilishicha, Afg‘oniston tomoni 2021-yildagi elektr energiyasi bo‘yicha qarzini to‘liq qoplagan. Afg‘on nashrida keltirilgan qarzdorlik summasi va 2022-yilda ushbu mamlakatning elektr energiyasi uchun O‘zbekistondan qarzdorligi bor-yo‘qligi haqidagi savolga izoh bermadi.
Eslatib o‘tamiz, 2021-yilning oktabr oyida Afg‘oniston energetika kompaniyasining O‘zbekiston, Tojikiston, Turkmaniston va Eronga elektr energiyasi uchun 51 million dollardan ortiq qarzi borligi xabar qilingan edi. Biroq O‘zbekiston bosh vaziri o‘rinbosari Sardor Umurzoqovning so‘zlariga ko‘ra, Afg‘oniston muvaqqat hukumati elektr energiyasi bo‘yicha qarzini to‘liq qoplash majburiyatini olgan va O‘zbekiston “bir soat ham” Kobulga elektr energiyasi yetkazib berishni to‘xtatmagan.
Izoh (0)