Бош прокуратура ҳузуридаги департамент органлари томонидан банкларнинг комплаенс-назорати тузилмалари билан ҳамкорлик доирасида пул маблағларининг талон-торож қилиниши бўйича аниқланган қонунбузилиш ҳолатлари юзасидан қонуний чоралар кўрилмоқда. Бу ҳақда департамент матбуот хизмати хабар берди.
Хусусан, Шароф Рашидов туманида АТБ «Қишлоққурилишбанк» Жиззах ҳудудий бошқармасининг мурожаатига асосан терговга қадар текширув ўтказилган. Текширувда, «Э.Д.» МЧЖга банк филиалидан ғишт маҳсулотлари ишлаб чиқариш ускуналарини сотиб олиш учун ажратилган 1,3 миллиард сўм кредит маблағини ўзи раҳбарлик қилиб келаётган бошқа корхоналарига ўтказиб олиш йўли билан маблағларни талон-торож қилгани аниқланган.
Шунингдек, Қашқадарё вилояти Муборак туманидаги «В.Л.» МЧЖ норасмий раҳбари У.Я. АТБ «Микрокредитбанк» Муборак филиалидан гаров таъминоти сифатида кўрсатилган техникаларни 660 миллионн сўмга қиммат баҳолатиш орқали ишлаб чиқариш дастгоҳлари ва металл маҳсулотлари сотиб олиш учун ажратилган 400 миллион сўм кредит маблағини нақдлаштириб олиб, талон-торож қилган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бухоро, Фарғона ва Сирдарё вилоятларида кредит маблағларини талон-торож қилиш ҳолатлари аниқлангани, Бекободда йўл таъмирлаш учун ажратилган 738 тонна маҳсулотни қарийб 1 млрд сўмга сотиб юборган мансабдорлар ушлангани, Сурхондарёда нон ишлаб чиқариш цехи ва дўкон қуриш учун ажратилган 2 млрд сўм кредитни ўзлаштирган тадбиркор қўлга олингани тўғрисида хабар берилганди.
Мавзуга доир:
Изоҳ (0)