Bugun, 19-may kuni Iste’dodli yoshlarni qo‘llab-quvvatlash “Ulug‘bek” jamg‘armasi tomonidan tashkil etilgan “Mirzo Ulug‘bek vorislari” respublika tanlovining yakuniy bosqichiga INNO texnoparkda start berildi. Yaqin 3 kun ichida bu yer iste’dodli yoshlarning qizg‘in intellektual bellashuvlariga boy bo‘lishi kutilmoqda.
Yaqinda shaxsan davlat rahbari tomonidan ochib berilgan INNO texnopark bugun iste’dodli, bilimga chanqoq yoshlar bilan to‘lib-toshgan. “Mirzo Ulug‘bek vorislari” tanlovining yakuniy bosqichi qiziqarli va istiqbolli innovatsion ishlanmalarga boy bo‘lishi kutilmoqda.
Ko‘rik-tanlovning tantanali ochilish marosimida Innovatsion rivojlanish vaziri Ibrohim Abdurahmonov, Oliy va o‘rta-maxsus ta’lim vaziri o‘rinbosari Rahimjon Hakimov hamda Innovatsiyalar milliy ofisi bosh direktori Olimjon To‘ychiyevlar so‘zga chiqib, marosim mehmonlari va musobaqa ishtirokchilarini samimiy qutlashdi, qatnashchilarga muvaffaqiyat tilashdi. Shundan so‘ng tadbirning tantanali qizil lenta kesish marosimi o‘tkazilib, intellektual bellashuv rasman ochiq deb e’lon qilindi.
Iste’dodli yoshlarni qo‘llab-quvvatlash “Ulug‘bek” jamg‘armasi tomonidan tashkil etilgan mazkur ko‘rik-tanlovdan ko‘zlangan asosiy maqsad, bilim olishga intilayotgan iqtidorli yoshlarni qo‘llab-quvvatlash, iqtisodiyotning turli tarmoqlarida real qo‘llaniladigan va o‘zbekistonliklar farovonligini oshirishga xizmat qiladigan innovatsion loyihalarni amalga oshirishga ko‘maklashishdan iborat. Intellektual musobaqa, shuningdek, yoshlar orasidan zamonaviy texnologiyalar bilan ishlay oladigan kadrlarni saralab olish va ularni mamlakat taraqqiyotiga xizmat qilish uchun yo‘naltirish imkonini ham beradi.
Eslatib o‘tamiz, musobaqa ishtirokchilari orasidan 100 ta eng yaxshi loyiha mualliflari Iste’dodli yoshlarni qo‘llab-quvvatlash “Ulug‘bek” jamg‘armasi tomonidan tashkil etiladigan maqsadli o‘quv kurslarida bepul o‘qish imkoniyatiga va BHMning 20 baravari (5 400 000 so‘m) miqdorida pul mukofotiga ega bo‘ladi. Shuningdek, tadbir doirasida barcha ishtirokchilar uch kun davomida poytaxtning diqqatga sazovor joylari bo‘ylab sayohat qilishadi.
Reklama huquqi asosida.
Izoh (0)