Бугун, 19 май куни Истеъдодли ёшларни қўллаб-қувватлаш «Улуғбек» жамғармаси томонидан ташкил этилган «Мирзо Улуғбек ворислари» республика танловининг якуний босқичига INNO технопаркда старт берилди. Яқин 3 кун ичида бу ер истеъдодли ёшларнинг қизғин интеллектуал беллашувларига бой бўлиши кутилмоқда.
Яқинда шахсан давлат раҳбари томонидан очиб берилган INNO технопарк бугун истеъдодли, билимга чанқоқ ёшлар билан тўлиб-тошган. «Мирзо Улуғбек ворислари» танловининг якуний босқичи қизиқарли ва истиқболли инновацион ишланмаларга бой бўлиши кутилмоқда.
Кўрик-танловнинг тантанали очилиш маросимида Инновацион ривожланиш вазири Иброҳим Абдураҳмонов, Олий ва ўрта-махсус таълим вазири ўринбосари Раҳимжон Ҳакимов ҳамда Инновациялар миллий офиси бош директори Олимжон Тўйчиевлар сўзга чиқиб, маросим меҳмонлари ва мусобақа иштирокчиларини самимий қутлашди, қатнашчиларга муваффақият тилашди. Шундан сўнг тадбирнинг тантанали қизил лента кесиш маросими ўтказилиб, интеллектуал беллашув расман очиқ деб эълон қилинди.
Истеъдодли ёшларни қўллаб-қувватлаш «Улуғбек» жамғармаси томонидан ташкил этилган мазкур кўрик-танловдан кўзланган асосий мақсад, билим олишга интилаётган иқтидорли ёшларни қўллаб-қувватлаш, иқтисодиётнинг турли тармоқларида реал қўлланиладиган ва ўзбекистонликлар фаровонлигини оширишга хизмат қиладиган инновацион лойиҳаларни амалга оширишга кўмаклашишдан иборат. Интеллектуал мусобақа, шунингдек, ёшлар орасидан замонавий технологиялар билан ишлай оладиган кадрларни саралаб олиш ва уларни мамлакат тараққиётига хизмат қилиш учун йўналтириш имконини ҳам беради.
Эслатиб ўтамиз, мусобақа иштирокчилари орасидан 100 та энг яхши лойиҳа муаллифлари Истеъдодли ёшларни қўллаб-қувватлаш «Улуғбек» жамғармаси томонидан ташкил этиладиган мақсадли ўқув курсларида бепул ўқиш имкониятига ва БҲМнинг 20 баравари (5 400 000 сўм) миқдорида пул мукофотига эга бўлади. Шунингдек, тадбир доирасида барча иштирокчилар уч кун давомида пойтахтнинг диққатга сазовор жойлари бўйлаб саёҳат қилишади.
Реклама ҳуқуқи асосида.
Изоҳ (0)