Jizzax shahrida moliyaviy piramidani targ‘ib qilish orqali fuqarolar chuv tushirgan shaxslarga nisbatan jinoyat ishi qo‘zg‘atildi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Jizzax shahar bo‘limi tomonidan tergovga qadar tekshiruv o‘tkazilgan. Tekshiruv davomida aniqlanishicha, Y.M., Sh.I. ismli shaxslar va boshqalar 2022-yilning mart oyida Gift Of Legacy nomli o‘yinni Instagram ijtimoiy tarmog‘i orqali tashkilotchilar ko‘rsatib o‘tgan plastik kartaga kamida 200 ming so‘m yoki 50 dollar miqdorida pul o‘tkazsa, qisqa muddatda ushbu mablag‘ni 7–8 barobarga ko‘paytirib olishlari haqida reklama e’lon qilgan.
Shuningdek, ular Telegram messenjerida “200 ming so‘mlik va 50 AQSH dollarlik onlayn gap” nomli guruhni tashkil etib, o‘yin ishtirokchilarining 692,3 million so‘mini o‘zlari va tanishlarining plastik kartalarga o‘tkazib olishga erishgan. Ma’lum bo‘lishicha, mazkur shaxslar pul mablag‘larining bir qismini keyingi ishtirokchilar hisobidan dastlabki ishtirokchilar hisobiga o‘tkazib bergan.
Mazkur holat yuzasidan Jinoyat kodeksining 188-1-moddasi (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda moliyaviy piramida tashkil qilib, fuqarolarning pullarini o‘zlashtirgan “Realnaya Investitsiya” rahbari ushlangani to‘g‘risida xabar berilgandi.
Izoh (0)