Жиззах шаҳрида молиявий пирамидани тарғиб қилиш орқали фуқаролар чув туширган шахсларга нисбатан жиноят иши қўзғатилди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Жиззах шаҳар бўлими томонидан терговга қадар текширув ўтказилган. Текширув давомида аниқланишича, Ю.М., Ш.И. исмли шахслар ва бошқалар 2022 йилнинг март ойида Gift Оf Legacy номли ўйинни Instagram ижтимоий тармоғи орқали ташкилотчилар кўрсатиб ўтган пластик картага камида 200 минг сўм ёки 50 доллар миқдорида пул ўтказса, қисқа муддатда ушбу маблағни 7–8 баробарга кўпайтириб олишлари ҳақида реклама эълон қилган.
Шунингдек, улар Telegram мессенжерида «200 минг сўмлик ва 50 АҚШ долларлик онлайн гап» номли гуруҳни ташкил этиб, ўйин иштирокчиларининг 692,3 миллион сўмини ўзлари ва танишларининг пластик карталарга ўтказиб олишга эришган. Маълум бўлишича, мазкур шахслар пул маблағларининг бир қисмини кейинги иштирокчилар ҳисобидан дастлабки иштирокчилар ҳисобига ўтказиб берган.
Мазкур ҳолат юзасидан Жиноят кодексининг 188-1-моддаси (пул маблағларини ва (ёки) бошқа мол-мулкни жалб этишга доир ноқонуний фаолият) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда молиявий пирамида ташкил қилиб, фуқароларнинг пулларини ўзлаштирган «Реалная Инвестиция» раҳбари ушлангани тўғрисида хабар берилганди.
Изоҳ (0)