Samarqandda “qiz talashib” akasini bolta bilan chopib tashlagan erkak 8 yilga qamaldi

Jinoyat ishlari bo‘yicha Samarqand shahar sudida akasini o‘ldirganlikda ayblanayotgan fuqaro sudlandi. Bu haqda Oliy sud axborot xizmati xabar qildi.

Mast fuqaro o‘z akasi va tanish ayolga bolta bilan tashlanib, turli darajadagi tan jarohatlari yetkazgan. Jabrlangan aka esa shifoxonada vafot etgan.

Qayd etilishicha, fuqaro spirtli ichimlikka mukkasidan ketgani uchun Jomboy tumanidagi narkologiya dispanseriga joylashtirilgan. U yerda bir ayol bilan tanishib qolgan. Ular shifoxonadan chiqqach, uchrashib yurgan. Keyinchalik fuqaro qizni Samarqand shahridagi akasining uyiga olib borib, birga yashashni boshlagan.

Hodisa sodir bo‘lgan kuni aka-uka va ayol kechgacha birgalikda spirtli ichimlik ichgan. Uka mast holatda tashqariga chiqib ketib, 15—20 daqiqada qaytib kelgan va akasi hamda ayolni ishqiy munosabat ustida ko‘rib qolgan. Jahl ustida avval ayolga, so‘ng akasiga tashlangan. Ularni bolta bilan bir necha marta urib, tan jarohati yetkazgan.

“Rashkim keldi. Birinchi qizni, keyin akamni urdim”, — deydi u sud majlisida.

Jabrlanganlar shifoxonaga olib borilishiga qaramay, aka oradan ikki kun o‘tgach, vafot etgan.

Uka holat yuzasidan Jinoyat kodeksining 104-moddasi 3-qismi “a,d” bandlarida (ikki yoki undan ortiq shaxsga nisbatan, jabrlanuvchining o‘lishiga sabab bo‘ladigan qasddan badanga og‘ir shikast yetkazish) ko‘rsatilgan jinoyatni sodir etganlikda aybdor deb topilgan. Unga nisbatan 8 yil muddatga ozodlikdan mahrum qilish jazosi tayinlangan.