Namanganda mahalla fuqarolar yig‘in raisligi uchun bo‘lib o‘tadigan saylovlarda ishtirok etadigan nomzodlarning 550 nafari yoki qariyb chorak qismi ayollardan iborat. Bu haqda viloyat Mahalla va nuroniylarni qo‘llab-quvvatlash boshqarmasi boshlig‘i Ahmadjon A’loxo‘jayev ma’lum qildi, deya xabar beradi “Daryo” muxbiri Azizbek Abduvaliyev.
A’loxo‘jayevning bildirishicha, viloyatdagi jami 782 ta mahallada raislar saylanadi. Ularda 220 mingga yaqin aholi vakillari ovoz beradi.
“Statistikaga qaraydigan bo‘lsak, nomzodlarimizning 2141 nafari yoki 93 foizi oliy ma’lumotli. Ularning uchdan bir qismi o‘qituvchilar. Nomzodlarimizning 461 nafari yoki 20 foizini amaldagi mahalla fuqarolar yig‘inlari raislari tashkil etmoqda. Raislik uchun kurash olish borishga kirishganlarning 664 nafari yoki qariyb 30 foizi 40 yoshgacha bo‘lganlardan iborat”, — deydi Ahmadjon A’loxo‘jayev.
Qayd etilishicha, saylovlarning aksariyat qismi mahallalar hududlaridagi maktablarda bo‘lib o‘tadi. Viloyatdagi saylov o‘tkaziladigan obyektlar va ularga olib boruvchi ko‘chalarni obodonlashtirish choralari ko‘rilgan, tadbirga bosh-qosh bo‘ladigan ishchi guruh a’zolari uchun zarur shart-sharoitlar yaratilgan.
Ma’lumot uchun, Namanganda 16-maydan e’tiboran mahalla fuqarolar yig‘inlari raisligiga saylovlar boshlandi. Bugungi saylovlar viloyatdagi 66 ta mahallada bo‘lib o‘tmoqda.
Izoh (0)