Germaniya yil oxirigacha Rossiya neftini import qilishni to‘xtatmoqchi. Yevropa Ittifoqi butun Yevropada Rossiya neftiga nisbatan sanksiyalarni joriy qila olmagan taqdirda ham import to‘xtaydi. Bu haqda Bloomberg xabar bermoqda.
Germaniya rasmiylarining aytishicha, Berlinda muqobil yetkazib beruvchilar bilan bitimlar tuzish harakatlari davom etmoqda. Hukumat keyingi 6-7 oy ichida logistika muammolarini hal qilishiga ishonmoqda.
Germaniya kansleri Olaf Shols o‘z milliy rejasini oldingga surishga qaror qildi. Biroq hukumat Rossiyaning o‘rnini qaysi davlatlar egallashini ma’lum qilmadi.
Berlindagi Iqtisodiyot vazirligi ma‘lumotlariga ko‘ra, Rossiyaning Germaniya xomashyo iste’molidagi ulushi Ukrainadagi urushgacha bo‘lgan taxminan 35 foizdan 12 foizga kamaydi.
Muammolar orasida asosiysi Sharqiy Germaniyada neftni qayta ishlash zavodi uchun yetarli miqdorda muqobil neft olib kirishdir. U asosan Drujba nomli quvur orqali Rossiya xom neftiga tayanadi va Kreml tomonidan qo‘llab-quvvatlanadigan ishlab chiqaruvchi “Rosneft” tomonidan boshqariladi.
Yevropa Ittifoqi taklifi kelgusi olti oyda neftni va yanvar oyi boshigacha tozalangan yoqilg‘ini taqiqlashni ko‘zda tutadi.
Sanksiyalarga Vengriya va Slovakiyaga 2024-yil oxirigacha, Chexiyaga esa 2024-yilning iyunigacha amal qilish taklif qilingan. Uchala davlat iqtisodiyoti ham asosan Rossiya neftiga tayanadi.
Vengriya Bosh vaziri Viktor Orban har qanday neft taqiqini Yevropa Ittifoqi yetakchilari sammitda muhokama qilishi kerakligini aytdi. Keyingi yig‘ilish may oyining oxiriga rejalashtirilgan.
Avvalroq Berlin Rossiya energiya resurslaridan butunlay voz kechish rejalarini oshkor qilgan edi.
Izoh (0)