Chevrolet avtomobillari Qozog‘istonda yana eng ko‘p sotilgan mashinaga aylandi. Bu haqda “Forbes.kz” xabar bermoqda.
Qozog‘iston avtobiznes assotsiatsiyasi ma’lumotlariga ko‘ra, 2022-yil aprel oyida respublikada yangi yengil avtomobillar sotuvi 9212 donani tashkil etdi. Bu 2021-yil apreliga nisbatan 8,9 foizga va joriy yilning mart oyiga nisbatan 14,3 foizga kam.
Chevrolet brendi bozor yetakchiligiga qaytdi – aprel oyida ushbu markadagi 3004 ta avtomobil sotib olindi, bu bir oy oldingiga nisbatan qariyb ikki marta (+73,8 foiz) va bir yil avvalgiga nisbatan 13,3 foizga ko‘p.
Birinchi chorakning avvalgi yetakchisi Hyundai eng ommabop brendlar ro‘yxatida ikkinchi o‘rinni qayd etdi — aprel oyida 1802 ta avtomobil sotilgan. Bu o‘tgan yilning shu davriga nisbatan 21,7 foizga va 2022-yilning mart oyiga nisbatan deyarli ikki barobar (-44,2 foiz) kam. Qozog‘istonda eng ko‘p sotilgan Hyundai — Elantra.
Kia uchinchi o‘rinni egalladi — aprel oyida sotuvlar 968 ta avtomobilni tashkil etdi. Bu o‘tgan yilning shu davriga nisbatan sotuvlar hajmini 27,2 foizga oshirdi. Ammo shu yilning martiga nisbatan bu ko‘rsatkich 23,7 foiz kamaygan. Brendning aprel oyida eng ko‘p sotilgan avtomobil rusumi Sorento krossoveri bo‘ldi – 442 ta mashina sotib olingan.
2021-yilda Chevrolet Qozog‘istonda eng ko‘p sotib olingan avtomobilga aylangan edi. Cobalt o‘tgan yili ham eng ommabop avtomobil rusumi bo‘lgan.
O‘zbekistonda ayni damda Cobalt uchun navbatlar 2022-yilning 31-dekabrigacha cho‘zilgan.
Qozog‘istonda Cobalt narxi 5,9 mln tenge yoki 154 mln so‘mdan boshlab sotiladi.
Izoh (0)