Германия йил охиригача Россия нефтини импорт қилишни тўхтатмоқчи. Европа Иттифоқи бутун Европада Россия нефтига нисбатан санкцияларни жорий қила олмаган тақдирда ҳам импорт тўхтайди. Бу ҳақда Bloomberg хабар бермоқда.
Германия расмийларининг айтишича, Берлинда муқобил етказиб берувчилар билан битимлар тузиш ҳаракатлари давом этмоқда. Ҳукумат кейинги 6-7 ой ичида логистика муаммоларини ҳал қилишига ишонмоқда.
Германия канцлери Олаф Шольц ўз миллий режасини олдингга суришга қарор қилди. Бироқ ҳукумат Россиянинг ўрнини қайси давлатлар эгаллашини маълум қилмади.
Берлиндаги Иқтисодиёт вазирлиги маълумотларига кўра, Россиянинг Германия хом ашё истеъмолидаги улуши Украинадаги урушгача бўлган тахминан 35 фоиздан 12 фоизга камайди.
Муаммолар орасида асосийси Шарқий Германияда нефтни қайта ишлаш заводи учун етарли миқдорда муқобил нефть олиб киришдир. У асосан Дружба номли қувур орқали Россия хом нефтига таянади ва Кремль томонидан қўллаб-қувватланадиган ишлаб чиқарувчи «Роснефть» томонидан бошқарилади.
Европа Иттифоқи таклифи келгуси олти ойда нефтни ва январь ойи бошигача тозаланган ёқилғини тақиқлашни кўзда тутади.
Санкцияларга Венгрия ва Словакияга 2024 йил охиригача, Чехияга эса 2024 йилнинг июнигача амал қилиш таклиф қилинган. Учала давлат иқтисодиёти ҳам асосан Россия нефтига таянади.
Венгрия Бош вазири Виктор Орбан ҳар қандай нефть тақиқини Европа Иттифоқи етакчилари саммитда муҳокама қилиши кераклигини айтди. Кейинги йиғилиш май ойининг охирига режалаштирилган.
Аввалроқ Берлин Россия энергия ресурсларидан бутунлай воз кечиш режаларини ошкор қилган эди.
Изоҳ (0)