Yevroittifoq, Buyuk Britaniya, AQSH va ularning ittifoqchilari Rossiya Viasat kompaniyasi boshqaradigan KA-SAT sun’iy yo‘ldosh tarmog‘iga uyushtirilgan kiberhujumga aloqadorligini gumon qilmoqda. Rossiyaning mazkur axborot xavfisizligi hodisalariga aloqadorligi xususida Buyuk Britaniya va AQSH maxsus xizmatlari axborot bergan.
G‘arb mamlakatlarining ma’lumotiga ko‘ra hujum 2022-yilning 24-fevralida tunda, Rossiya Ukrainaga bostirib kirishidan bir soat avval boshlangan. Xakerlarning harakatlari Ukraina harbiylariga qarshi qaratilgan, biroq Ukraina tashqarisida ham katta miqyosdagi oqibatlarga olib kelgan.
“Kiberhujum jiddiy oqibatlarni vujudga keltirgan, Ukrainaning bir qator davlat organlari va korxonalarida katta uzilishlar kuzatilgan, shuningdek mahalliy foydalanuvchilar, bir qator YIga a’zo mamlakatlarning aholisida texnik muammolar bo‘lgan”, — deydi Yevropa ittifoqining xorijiy masalalar bo‘yicha oliy vakili Jozep Borrel.
Buyuk Britaniya ma’lumotlari bo‘yicha hujum Ukrainadagi minglab mijozlarning internet bilan bog‘liq faoliyatida uzilishlarni yuzga keltirgan, shuningdek elektrstansiyalar va Markaziy Yevropadagi internet foydalanuvchilariga salbiy ta’sir ko‘rsatgan.
AQSH davlat departamenti xakerlarning harakati Ukrainadagi va butun Yevropadagi sun’iy yo‘ldosh terminallari faoliyatini izdan chiqarganini qayd etdi. Viasat kompaniyasi mart oyidayoq 24-fevraldagi kiberhujum Ukrainada minglab, Yevropada o‘n minglab mijozlarga ta’sir qilgani haqida xabar bergan.
AQSH Rossiyaning Ukrainaga qarshi kiberoperatsiyalarni 2022-yil yanvarida boshlagan va urush vaqtida ham davom ettirmoqda deb hisoblaydi.
Rossiya vakillari mazkur ayblovlar yuzasidan rasmiy izoh bermagan. Moskva vakillari doimo Ukraina, YI va AQSHdagi kiberhujumlarga aloqasi yo‘qligini ta’kidlab keladi.
Izoh (0)