Filippin Markaziy saylov komissiyasi mamlakatda o‘tkazilgan prezidentlik saylovlarining dastlabki natijalarini e’lon qildi, unga ko‘ra 64 yoshli kichik Ferdinand Markos hamma nomzodlardan ko‘proq ovoz olgan. Bu haqda Reuters xabar berdi.
98 foiz saylov byulletenlarining hisob-kitobi uning 31 million ovoz olganini, eng yaqin ta’qibchi, asosiy raqib vitse-prezident esa bundan ikki baravar kam ovozga ega ekanligini ko‘rsatmoqda. Saylovlarning rasmiy natijalari oy oxirida e’lon qilinadi, yangi prezident 30-iyun kuni o‘z lavozimida ishga kirishadi.
Filippin MSK e’lon qilgan natijalardan keyin poytaxt ko‘chalarida xalqning norozilik namoyishlari boshlanib ketdi. Yuzlab filippinliklar, asosan, talaba yoshlar MSK binosi oldidan namoyishkorona piyoda o‘tishdi va u yerda saylovlarda kuzatilgan qonun buzilishi holatlari haqida hayqirishdi.
Karapatan huquqni himoya qilish tashkiloti filippinliklarni kichik Markosning prezident lavozimini egallashiga qarshi chiqishga chaqirgan, tashkilot vakillarining so‘zlariga ko‘ra Markos hokimiyati yolg‘on hamda noto‘g‘ri axborotga qurilgan, asosiy maqsad esa Markoslar oilasining hukumatga qaytish – yovuz istagini amalga oshirishdan iborat. Namoyishlardagi yetakchilardan biri Renato Reyesning aytishicha, ishtirokchilar diktator Markosning merosxo‘rini hokimiyat tepasiga qaytarayotgan Filippin davlat boshqaruvi tizimini qoralamoqda.
Kichik Ferdinand Markos 1986-yilda oilasi bilan birgalikda mamlakatda “xalq hokimiyati isyoni” nomini olgan harbiy to‘ntarish amalga oshirilganidan keyin Gavayi orollariga qochib ketgan. Katta Markos prezidentligi davrida zo‘ravon avtoritar boshqaruv, hukumatda korrupsiyaning ildiz otishi va mazkur tizimga qarshi chiqqanlarning qatag‘oni kuzatilgan. Biroq kichik Markos 1991-yilda Filippinga qaytgan va ko‘p yillar davomida Kongress a’zosi bo‘lgan. Prezidentlik saylovlarida u ommaviy debatlarda ishtirok etmagan, intervyu bermagan va aniq siyosiy dasturga ega bo‘lmaganiga qaramay ijobiy natijaga erishgan.
Kichik Ferdinand Markos otasini daho davlat arbobi deb e’tirof qilgani juda ko‘p marta tanqidlarga uchragan. Kuzatuvchilar kichik Ferdinand Markosning vitse-prezidentlik lavozimiga amaldagi davlat rahbari Rodrigo Dutertening qizi Sara Duterte-Karpioni tanlab juda yaxshi taktik hiyla ishlatganini ta’kidlamoqda. Rodrigo Duterte giyohvand moddalar savdosiga qarshi kurash vaqtida minglab odamlarni sudsiz o‘ldirib yuborganlikda gumon qilinadi. Ekspertlar kichik Markosning Duterte siyosatini davom ettirishini taxmin qilgan.
Izoh (0)