Ispaniya razvedkasi milliy markazi rahbari (CNI) Pas Esteban Pegasus dasturiy mahsuloti bilan bir qator kataloniyalik siyosatchilarning telefondagi suhbatlarini yozib olishga urinishlar bo‘lgani tufayli iste’foga chiqdi. Bu haqda bir qator ispan OAV axborotiga tayanib, The Guardian xabar qilgan.
Xususan, Kataloniya jeneralitetining prezidenti Pere Aragonesning telefoniga kiberhujum uyushtirilgan. Shuningdek, Pegasus dasturiy ta’minotidan bosh vazir Pedro Sanches, mudofaa vaziri Margarita Roblesning telefonlariga hujum qilishda foydalanilgan.
O‘tgan haftada Esteban Ispaniya parlamentining quyi palatasiga bergan axborotida 18 nafar kataloniyalik siyosatchilar hayoti yashirin ravishda kuzatilganini tasdiqlagan. Mazkur xabar tarqalishidan ikki hafta avval kiberxavfsizlik sohasidagi ekspertlar mustaqillik uchun kurashayotgan kamida 63 nafar kataloniyalik siyosatchi Pegasus dasturi yordamida kuzatilgani xususida axborotlar paydo bo‘lgan.
O‘z navbatida Aragones mazkur mojaroning Kataloniyadagi chigal vaziyatni diplomatik yo‘l bilan tartibga solishni yanada qiyinlashtirishini bildirgan.
The Guardian’ning yozishicha hudud mustaqilligi uchun kurashayotgan, ispan hukumati bilan ittifoqdagi “Kataloniya so‘l respublikachilari” partiyasi Madriddan yo‘qotilgan ishonchni tiklashni talab qilgan.
Ammo bosh vazir Sanches vakili bo‘lgan Ispaniya sotsialist ishchilar partiyasi, yana boshqa uch partiya bilan birgalikda hodisani parlament tartibida tekshirishni taqiqlab qo‘ygan. Partiya vakili CNI ichki tekshiruvni boshlagani tufayli parlament surishtiruvini o‘tkazish zarurati yo‘qligini qayd etgan.
Avval Ispaniya qiroli mol-mulki haqidagi deklaratsiyani e’lon qilgani haqida xabar berilgandi.
Izoh (0)