Ukrainaning birinchi prezidenti Leonid Kravchuk 10-may kuni 88 yoshida vafot etdi, deb xabar bermoqda “Ukrainskiy novosti” axborot agentligi.
Kravchuk uzoq davom etgan xastalikdan so‘ng olamdan o‘tdi, dedi agentlikka Kravchukning do‘stlari davrasidagi manba. Ma’lumotni marhum siyosatchining oilasi tasdiqlagan.
Leonid Kravchuk Ukrainani 1991-yilning dekabridan 1994-yilning iyuligacha boshqargan. Prezident sifatida u SSSRning parchalanishiga xizmat qilgan Belovej kelishuvlarini imzolagan.
Eslatib o‘tamiz, 4-mayga o‘tar kechasi mustaqil Belarusning birinchi rahbari Stanislav Shushkevich Minskda 87 yoshida vafot etgandi. U ham Kravchuk kabi Belovej kelishuvlarini imzolashda ishtirok etgan.
Mart oyi oxirida Ozarbayjonning birinchi prezidenti Ayaz Mutalibov 83 yoshida vafot etgandi.
Shuningdek, Mali sobiq prezidenti Ibrohim Bubakar, Yevropa parlamentining rahbari David Sassoli, Janubiy Afrika Respublikasining sobiq prezidenti, tinchlik bo‘yicha Nobel sovrindori Frederik Villem de Klerk vafot etgani haqida xabarlar berilgan.
Izoh (0)