Евроиттифоқ, Буюк Британия, АҚШ ва уларнинг иттифоқчилари Россия Виасат компанияси бошқарадиган КА-SAT сунъий йўлдош тармоғига уюштирилган киберҳужумга алоқадорлигини гумон қилмоқда. Россиянинг мазкур ахборот хавфисизлиги ҳодисаларига алоқадорлиги хусусида Буюк Британия ва АҚШ махсус хизматлари ахборот берган.
Ғарб мамлакатларининг маълумотига кўра ҳужум 2022 йилнинг 24 февралида тунда, Россия Украинага бостириб киришидан бир соат аввал бошланган. Хакерларнинг ҳаракатлари Украина ҳарбийларига қарши қаратилган, бироқ Украина ташқарисида ҳам катта миқёсдаги оқибатларга олиб келган.
«Киберҳужум жиддий оқибатларни вужудга келтирган, Украинанинг бир қатор давлат органлари ва корхоналарида катта узилишлар кузатилган, шунингдек маҳаллий фойдаланувчилар, бир қатор ЕИга аъзо мамлакатларнинг аҳолисида техник муаммолар бўлган», — дейди Европа иттифоқининг хорижий масалалар бўйича олий вакили Жозеп Боррел.
Буюк Британия маълумотлари бўйича ҳужум Украинадаги минглаб мижозларнинг интернет билан боғлиқ фаолиятида узилишларни юзга келтирган, шунингдек электрстанциялар ва Марказий Европадаги интернет фойдаланувчиларига салбий таъсир кўрсатган.
АҚШ давлат департаменти хакерларнинг ҳаракати Украинадаги ва бутун Европадаги сунъий йўлдош терминаллари фаолиятини издан чиқарганини қайд этди. Виасат компанияси март ойидаёқ 24 февралдаги киберҳужум Украинада минглаб, Европада ўн минглаб мижозларга таъсир қилгани ҳақида хабар берган.
АҚШ Россиянинг Украинага қарши кибероперацияларни 2022 йил январида бошлаган ва уруш вақтида ҳам давом эттирмоқда деб ҳисоблайди.
Россия вакиллари мазкур айбловлар юзасидан расмий изоҳ бермаган. Москва вакиллари доимо Украина, ЕИ ва АҚШдаги киберҳужумларга алоқаси йўқлигини таъкидлаб келади.
Изоҳ (0)