Finlyandiya va Shvetsiya NATO tarkibiga kiradigan bo‘lsa, AQSH ushbu davlatlar xavfsizligini ta’minlay oladi. Bu haqda Oq uy matbuot kotibi Jen Psaki ma’lum qildi.
“Biz (AQSH) ularda (Finlyandiya va Shvetsiyada) yuzaga kelishi mumkin bo‘lgan har qanday xavfsizlik masalalarida yordam bera olishimizga ishonchimiz komil”, — dedi u AQSHning ushbu davlatlar xavfsizligini ta’minlashga tayyorligi haqidagi savolga javob berib.
Psakining so‘zlariga ko‘ra, AQSH va Skandinaviya davlatlarining harbiy bo‘linmalari ko‘p yillardan beri hamkorlikda ishlab kelmoqda, shu bois “ular hatto alyansga rasman kirishdan oldingi davrda ham paydo bo‘ladigan har qanday muammolarni yengib o‘tishga qodir”.
Ukrainada Rossiya bosqini boshlanganidan so‘ng, Shvetsiya va Finlyandiya hukumatlari mamlakatlarning NATOga qo‘shilishi imkoniyatlari haqida qayta gapirishni boshladi. Aprel oyi o‘rtalarida Shvetsiyaning Svenska Dagbladet gazetasi hukmron partiyadagi manbalarga tayanib, bosh vazir Magdalena Andersson iyun oyi boshida a’zolik to‘g‘risida ariza berishni rejalashtirayotgani haqida xabar berdi. 5-aprel kuni ushbu nashr Shvetsiya hukmron partiyasining bir qismi mamlakatning NATOga kirishiga qarshi ekanini yozdi.
Bugungi kunda Shvetsiya va Finlyandiya NATOning hamkor davlatlari maqomiga ega. Blokka 30 ta davlat, jumladan Daniya va Norvegiya a’zo.
NATO Bosh kotibi Yens Stoltenberg alyans Finlyandiya va Shvetsiyadan so‘rov bo‘lsa, ularni qisqa fursatda qabul qila olishini aytgandi. Shu bilan birga, Xorvatiya prezidenti Zoran Milanovich Skandinaviya davlatlarining Shimoliy Atlantika alyansiga qo‘shilishiga veto qo‘yishga va’da bergan. Uning so‘zlariga ko‘ra, “angliyaliklar va nemislar Bosniya hukumatini saylov qonunchiligini o‘zgartirishga va xorvatlarga fundamental huquqlar berishga majburlamaguncha” bu masalada Xorvatiya bilan kelishib bo‘lmaydi.
Rossiya prezidentining matbuot kotibi Dmitriy Peskov Sky News telekanaliga bergan intervyusida Shvetsiya va Finlyandiyaning ittifoqqa kirishi orqali NATOning yanada kengayishini ekzistensial tahdid deb hisoblamasligini aytgandi. Biroq uning so‘zlariga ko‘ra, agar davlatlar ittifoqqa qo‘shilsa, Rossiya “vaziyatni muvozanatlashi”ga to‘g‘ri keladi. “Keyin biz g‘arbiy qanotimizni xavfsizlik nuqtayi nazaridan yanada murakkablashtirishimiz kerak bo‘ladi”, — deya qo‘shimcha qilgan u.
Rossiya tashqi ishlar vaziri Sergey Lavrov yanvar oyi o‘rtalarida NATO “yangi a’zolarni, jumladan, Skandinaviya mamlakatlarini sun’iy ravishda jalb qilishga” urinayotganini aytgan.
Izoh (0)