AQSHda mehnat unumdorligi joriy yilning birinchi choragida 2021-yilning to‘rtinchi choragiga nisbatan 7,5 foizga kamaydi. Bu ma’lumot 5-may kuni AQSH Federal Mehnat statistikasi byurosi tomonidan e’lon qilindi.
Bu 1947-yildan beri mehnat unumdorligining eng katta pasayishi. Shu bilan birga, kompaniyalarning mehnat xarajatlari ilk chorakda 11,6 foizga o‘sdi. Bu 1982-yildan beri eng yuqori o‘sishdir.
Mehnat unumdorligining pasayishi Qo‘shma Shtatlarda ishchi kuchiga talabning tez o‘sishi bilan bog‘liq. Shu sababli, so‘nggi oylarda odamlar yaxshi maosh olish uchun ish joylarini o‘zgartirish ehtimoli oshmoqda.
Bundan tashqari, chorak davomida umumiy ovqatlanish kabi unumdorligi past bo‘lgan tarmoqlarda ko‘plab ish o‘rinlari paydo bo‘ldi. AQSH yalpi ichki mahsulotining 1,4 foizga qisqarishi ham mehnat unumdorligining pasayishiga o‘z ta’sirini ko‘rsatdi.
YaIMning pasayishi, birinchi navbatda, tovar-moddiy boyliklarning qisqarishi va savdo taqchilligi kabi texnik ko‘rsatkichlar bilan bog‘liqligi aytilmoqda.
Avvalroq AQSHda ishdan bo‘shagan xodimlar va yangi ochilgan ish o‘rinlari borasida rekord o‘rnatilgani haqida xabar berilgan edi.
Izoh (0)