O‘zbekistonda 2022-yilda restavratsiya qilinadigan obidalar ro‘yxati shakllantirildi

O‘zbekistonda 2022-yil davomida asrashga doir ishlar amalga oshiriladigan moddiy madaniy meros ko‘chmas mulk obyektlarining manzilli ro‘yxati tasdiqlandi. Bu haqda Madaniy meros agentligi matbuot xizmati xabar berdi.

Unga ko‘ra, ushbu ro‘yxatdan jami 34 ta madaniy meros obyekti o‘rin olgan va ularni ta’mirlash-tiklash ishlari uchun jami 75 milliard so‘m sarflanishi rejalashtirilgan. An’anaviy ravishda har yili respublika bo‘yicha avariya holatidagi yoki e’tibordan chetda qolgan madaniy meros obyektlarini restavratsiya va ta’mirlash-tiklash ishlari uchun milliy ro‘yxat shakllantiriladi.

Xususan, 2022-yilgi ro‘yxatga ko‘ra, ko‘plab tanqidlarga sabab bo‘lgan Bahodir Yalangto‘shbiy madrasasi, Talipoch qal’a qoldiqlari, Ulug‘bek madrasasi, Amir Olimxon madrasasi, Ko‘k gumbaz, Oq Saroy, Islom Xo‘ja yozgi qarorgohi, Chodra hovli kabi obyektlarda restavratsiya ishlari olib borilishi rejalashtirilgan.

Shuningdek, Buxoro “Ark” qo‘rg‘oni majmuasidagi Qushbegi, Sayisxona, Salomxona, Taxtxona madaniy meros obyektlarida ta’mirlash tiklash ishlari olib boriladi. Eng e’tiborga molik loyihalardan biri esa — “Ark” qo‘rg‘oni majmuasi vayronalari qismida “Arxeologik park” tashkil qilish bo‘lib turibdi. Buxoro shahridagi “Masjidi Kalon” (Poyi Kalon majmuasi) qulab tushgan qismlar va ta’mirtalab devorlarini ta’mirlash-qayta tiklash, atrofini obodonlashtirish ishlarini ham 2022-yilning IV choragida amalga oshirish rejalashtirilgan.

“Moddiy madaniy meros ko‘chmas mulk obyektlarida amalga oshiriladigan asrashga doir ishlar uchun zarur bo‘lgan mablag‘lar miqdori loyiha-smeta hujjatlari asosida aniqlanadi. Asrashga doir ishlar tegishli Madaniy meros obyektlari restavratsiya direksiyasi tomonidan amalga oshiriladi”, — deyiladi xabarda.

Ta’kidlanishicha, zarur hollarda mazkur manzilli ro‘yxatga Madaniy meros agentligi takliflari hamda Vazirlar Mahkamasining Madaniy merosni himoya qilish inspeksiyasi xulosasiga ko‘ra bosh vazir o‘rinbosari – turizm va madaniy meros vaziri tomonidan o‘zgartirish va qo‘shimchalar kiritilishi mumkin.

Avvalroq Buxoroda arxeologik yodgorlik hududi yaylov uchun berib yuborilgani, Xorazmda me’moriy arxitektura yodgorligi hisoblanuvchi Deshon qal’aning bir qismi qulab tushgani, Buxorodagi devori o‘pirilib tushgan “Talipoch qal’a darvozasi”ni ta’mirlashga 1 mlrd so‘m ajratilgani, Sitorai Mohi Xossa majmuasining restavratsiya ishlari noto‘g‘ri olib borilgani sabab jinoyat ishi qo‘zg‘atilgani to‘g‘risida xabar berilgandi.